ពេលបច្ចុប្បន្ន ការពិនិត្យពិភាក្សានិងបោះឆ្នោតលើសេចក្តីព្រាងច្បាប់វិនិយោគទុនសម្រាប់ពាណិជ្ជករបរទេសជារបៀបវារៈដ៏សំខាន់មួយនៃមហាសន្និបាតលើកទីពីរនៃសភាតំណាងប្រជាជនទូទាំងប្រទេសចិននីតិកាលទី១៣ដែលបើកធ្វើនៅក្រុងប៉េកាំង ។ ក្នុងឋានៈជាច្បាប់មូលដ្ឋានថ្មីក្នុងវិស័យវិនិយោគសម្រាប់ពាណិជ្ជករបរទេសរបស់ចិន សេចក្តីព្រាងច្បាប់ដែលត្រូវបានគេយកចិត្តទុកដាក់យ៉ាងខ្លាំងនេះបានកំណត់ជាទូទៅអំពីការអនុញ្ញាតិចូលទីផ្សារ ជំរុញ ការពារនិងគ្រប់គ្រងចំពោះការវិនិយោគរបស់ពាណិជ្ជករបរទេស ។ តំណាងសភាតំណាងប្រជាជនទូទាំងប្រទេសចិនទាំងអស់បានថ្លែងនៅពេលពិនិត្យពិភាក្សាយ៉ាងម៉ត់ចត់ចំពោះសេចក្តីព្រាងច្បាប់នេះថា ការធ្វើនិងអនុវត្តច្បាប់វិនិយោគទុនរបស់ពាណិជ្ជករបរទេស នឹងផ្តល់ការធានាផ្នែកច្បាប់កាន់តែខ្លាំងក្លាចំពោះការបើកទូលាយដោយកម្រិតខ្ពស់វគ្គថ្មីមួយ ព្រមទាំងបង្ហាញទំនុកចិត្តនិងការប្តេជ្ញាចិត្តរបស់ចិនក្នុងការជំរុញការអភិវឌ្ឍដោយគុណភាពខ្ពស់តាមរយៈការបើកទូលាយដោយកម្រិតខ្ពស់ ។
សេចក្តីព្រាងច្បាប់វិនិយោគទុនសម្រាប់ពាណិជ្ជករបរទេសដែលដាក់ជូនឲ្យសន្និសីទប្រចាំឆ្នាំនៃសភាតំណាងប្រជាជនទូទាំងប្រទេសចិនពិនិត្យពិភាក្សានោះ បានលើកឡើងយ៉ាងច្បាស់លាស់ថា នឹងលើកកម្ពស់តម្លាភាពនៃគោលនយោបាយស្តីពីការវិនិយោគរបស់ពាណិជ្ជករបរទេស ធានាសហគ្រាសដែលវិនិយោគដោយពាណិជ្ជករបរទេសអាចចូលរួមប្រកួតប្រជែងក្នុងទីផ្សារដោយយុត្តិធម៌ បង្កើនសេវាកម្មខាងការវិនិយោគរបស់ពាណិជ្ជករបរទេស បង្កើនការការពារកម្មសិទ្ធិនៃសហគ្រាសដែលវិនិយោគដោយពាណិជ្ជករបរទេស រដ្ឋអនុវត្តការផ្តល់ភាពអនុគ្រោះឲ្យដូចជាប្រជាពលរដ្ឋចិនមុនចូលទីផ្សារជាមួយប្រព័ន្ធគ្រប់គ្រងនៃបញ្ជីអវិជ្ជមាន ។
ក្នុងអំឡុងពេលចូលរួមពិនិត្យពិភាក្សាតំណាងនៃសភាតំណាងប្រជាជនទូទាំងប្រទេសបានបញ្ជាក់ថា បើប្រៀបធៀបនឹង"ច្បាប់ស្តីពីទុនបរទេសទាំង៣" គឺ<ច្បាប់ស្តីពីសហគ្រាសដែលចិននិងបរទេសរួមទុនធ្វើអាជីវកម្ម> <ច្បាប់ស្តីពីសហគ្រាសទុនបរទេស> និង <ច្បាប់ស្តីពីសហគ្រាសដែលចិននិងបរទេសសហប្រតិបត្តិការធ្វើអាជិវកម្ម> សេចក្តីព្រាងច្បាប់នេះបានបង្ហាញបន្ថែមទៀតពីការពង្រីកការបើកទូលាយនិងការលើកកម្ពស់ការវិនិយោគរបស់ពាណិជ្ជករបរទេសនិងបានឆ្លុះបញ្ចាំងពីការរួមបញ្ចូលគ្នានៃលក្ខណៈពិសេសចិននិងច្បាប់អន្ដរជាតិ។លោក Hong Weimin តំណាងនៃសភាតំណាងប្រជាជនទូទាំងប្រទេសនិងជាប្រធានសមាគមជំនាញបណ្តាញអ៊ីនធឺណេតហុងកុងជឿជាក់ថា បទប្បញ្ញត្តិនៃសេចក្តីព្រាងច្បាប់ស្តីពីការលើកកម្ពស់ការបង្រួបបង្រួមនៃច្បាប់សម្រាប់សហគ្រាសចិននិងបរទេស ផ្តល់ផលប្រយោជន៍ដល់ការអនុវត្តតាមគោលការណ៍ស្មើភាពគ្នា ក៏ដូចជាបង្កើតឲ្យមានបរិយាកាសទីផ្សារប្រកបដោយស្ថិរភាព តម្លាភាព យុត្តិធម៌និងអាចព្យាករណ៍បាន ហើយក៏អំណោយផលដល់ការចូលរួមដោយស្មើភាពគ្នានៃសហគ្រាសគ្រប់ប្រភេទផងដែរ។
ទិន្នន័យបានបង្ហាញឲ្យឃើញថា ក្នុងរយៈពេលជាង ៤០ ឆ្នាំបន្ទាប់ពីធ្វើកំណែទម្រង់និងការបើកទូលាយ ប្រទេសចិនបានទាក់ទាញការវិនិយោគផ្ទាល់ពីបរទេសក្នុងទំហំទឹកប្រាក់ចំនួនលើសពី ២.១ ទ្រីលានដុល្លាអាមេរិក។ ជាច្រើនឆ្នាំកន្លងមកនេះ ប្រទេសចិននៅតែជាប្រទេសកំពុងអភិវឌ្ឍន៍ដែលទាក់ទាញការវិនិយោគពីបរទេសច្រើនបំផុតលើពិភពលោក។ ជាពិសេសឆ្នាំ ២០១៨ ក្រោមសភាពការណ៍ដែលការបណ្តាក់ទុនឆ្លងប្រទេសទូទាំងពិភពលោកមានការធ្លាក់ចុះចំនួន ១៩ % បើប្រៀបធៀបនឹងឆ្នាំមុន ចំនួនប្រាក់ទុនវិនិយោគពីបរទេសដែលប្រទេសចិនអាចប្រើប្រាស់ជាក់ស្តែងនៅតែកើនឡើងចំនួន ៣ % បានលើសពី 138000 លានដុល្លាអាមេរិក ដោយបានបង្កើតកំណត់ត្រាថ្មីលើប្រវត្តិសាស្ត្រ។
លោកស្រី Zheng Shuna សមាជិកនៃគណៈកម្មាធិការអចិន្ត្រៃយ៍សភាតំណាងប្រជាជនទូទាំងប្រទេសចិន និងជាសមាជិកគណៈកម្មាធិការរដ្ឋធម្មនុញ្ញនិងច្បាប់នៃសភាតំណាងប្រជាជនទូទាំងប្រទេសចិន បានយល់ឃើញថា ការទាក់ទាញនិងការប្រើប្រាស់វិនិយោគទុនបរទេសដោយវិជ្ជមាន ជាផ្នែកដ៏សំខាន់សម្រាប់ប្រទេសចិន ដើម្បីពង្រីកការបើកទូលាយនិងការបង្កើតយន្តការថ្មីនៃសេដ្ឋកិច្ចបែបបើកទូលាយ ។ ដូច្នេះ ចាំបាច់ត្រូវមានការធានារ៉ាប់រ៉ងផ្នែកច្បាប់ដ៏សមរម្យនិងគ្រប់គ្រាន់។
ចាប់តាំងពីការអនុវត្តកំណែទម្រង់និងការបើកទូលាយជាង ៤០ ឆ្នាំមក សេដ្ឋកិច្ចប្រទេសចិនបានអភិវឌ្ឍយ៉ាងលឿន ដើម្បីសម្រេចបាននូវការអភិវឌ្ឍដោយកម្រិតខ្ពស់និងគុណភាពខ្ពស់នៅពេលអនាគត គឺចាំបាច់ត្រូវតែដំណើរការក្នុងល័ក្ខខ័ណ្ឌកាន់តែបើកទូលាយថែមទៀត ។ លោកស្រីFanyun តំណាងនៃសភាតំណាងប្រជាជនទូទាំងប្រទេសចិននិងជាអនុប្រធានសហគមន៍ឧស្សាហកម្មនិងពាណិជ្ជកម្មក្រុងសៀងហៃបានសម្គាល់ថា សេចក្តីព្រាងច្បាប់វិនិយោគសម្រាប់ពាណិជ្ជករបរទេសនឹងធ្វើឲ្យសហគ្រាសជាតិនិងអន្តរជាតិឈរនៅមូលដ្ឋានដូចគ្នា ប្រកួតប្រជែងដោយស្មើភាព វាអាចជំរុញឲ្យសេដ្ឋកិច្ចចិនរីកចម្រើនទៅមុខដោយកម្រិតកាន់តែខ្ពស់និងគុណភាពកាន់តែខ្ពស់ក្នុងរចនាសម្ព័ន្ធថ្មីដែលបើកទូលាយគ្រប់ជ្រុងជ្រោយ ។
នាឆ្នាំ ២០១៨ ដែលទើបកន្លងផុតទៅ ការប្រើប្រាស់ទុនបរទេសជាក់ស្តែងនៃតំបន់ភាគកណ្តាលនិងភាគខាងលិចប្រទេសចិនបានសម្រេចកំណើនដោយអត្រាពីរខ្ទង់ បានក្លាយជាកន្លែងទាក់ទាញសម្រាប់ការវិនិយោគនៃវិនិយោគិនបរទេសយ៉ាងខ្លាំង ។ លោកLibiao តំណាងនៃសភាតំណាងប្រជាជនទូទាំងប្រទេសចិននិងជាអនុប្រធានសហគមន៍ឧស្សាហកម្មនិងពាណិជ្ជកម្មខេត្តSichuanបានថ្លែងថា បន្ទាប់ពីដាក់ចេញនូវច្បាប់វិនិយោគសម្រាប់ពាណិជ្ជករបរទេស នឹងនាំមកនូវឱកាសអភិវឌ្ឍន៍កាន់តែច្រើនដល់តំបន់ភាគកណ្តាលនិងភាគខាងលិចប្រទេសចិន ។
យោងតាមរបៀបវារៈនៃមហាសន្និបាតលើកនេះ តំណាងនៃសភាតំណាងប្រជាជនទូទាំងប្រទេសចិនដែលបានចូលរួមមហាសន្និបាតនឹងបោះឆ្នោតសម្រេចលើសេចក្តីព្រាងនៃច្បាប់វិនិយោគសម្រាប់ពាណិជ្ជករបរទេសនេះនៅថ្ងៃទី ១៥ ខែមីនា ៕
