ពេលផ្តល់បទសម្ភាសន៍ពិសេសជាមួយអ្នកសារព័ត៌មាននៅក្រុងប៉េកាំងនាពេលថ្មីៗកន្លងទៅនេះ លោក U Thit Linn Ohn ឯកអគ្គរដ្ឋទូតមីយ៉ាន់ម៉ាប្រចាំនៅប្រទេសចិនបានថ្លែងថា តបតាមសេចក្តីអញ្ជើញ លោកបានចូលរួមដើម្បីស្តាប់របាយការណ៍ការងាររដ្ឋាភិបាលដែលថ្លែងដោយលោកលីខឺឈាង នាយករដ្ឋមន្ត្រីចិនក្នុងពិធីសម្ពោធបើកមហាសន្និបាតលើកទី ២ នៃសភាតំណាងប្រជាជនទូទាំងប្រទេសចិនអាណត្តិទី ១៣ កាលពីថ្ងៃទី ៥ ខែមីនា ។ លោកបានសម្គាល់ថា ការអភិវឌ្ឍយ៉ាងឆាប់រហ័សប្រកបដោយភាពនឹងនររបស់ចិនមានទំនាក់ទំនងយ៉ាងជិតស្និទ្ធជាមួយប្រព័ន្ធនយោបាយចិននិងការដឹកនាំដោយបក្សកុម្មុយនិស្តចិន ។ ក្រោមការដឹកនាំរបស់បក្សកុម្មុយនិស្តចិន ប្រជាជនទូទាំងប្រទេសសមាគ្គីគ្នាជាធ្លុងមួយ ខិតខំប្រឹងប្រែងដើម្បីអភិវឌ្ឍសេដ្ឋកិច្ចនិងការច្មៃប្រឌិតថ្មី ហើយទទួលបានសមិទ្ធផលគួរឲ្យពិភពលោកចាប់អារម្មណ៍ ។
លោកបានយកចិត្តទុកដាក់យ៉ាងខ្លាំងចំពោះសមិទ្ធផលនៃកិច្ចការកាត់បន្ថយភាពក្រីក្រនៃប្រទេសចិន ដោយបានបញ្ជាក់ថា ការប្តូរលំនៅដ្ឋានទៅកាន់តំបន់ផ្សេងទៀតជាវិធានការដ៏ចាំបាច់និងប្រកបដោយប្រសិទ្ធភាពក្នុងកិច្ចការជួយសម្រាលបន្ទុករបស់ជនក្រីក្រនិងកាត់បន្ថយភាពក្រីក្រ ៕
