ថ្ងៃទី ៤ ខែមីនា វេទិកាសហប្រតិបតិ្តការហិញ្ញវត្ថុនៃអាស៊ីបូព៌ាដែលជាសកម្មភាពលើកដំបូងនៃសកម្មភាពពាក់ព័ន្ធមួយចំនួនរបស់វេទិកាហ្សាការតាស្តីពីទំនាក់ទំនងចិននិងអាស៊ានបានប្រារព្ធធ្វើដោយជោគជ័យនៅក្រុងហ្សាការតា រដ្ឋធានីប្រទេសឥណ្ឌូណេស៊ី ។ បន្ទាប់ពីបញ្ចប់សកម្មភាព លោក Huang Xilian ឯកអគ្គរដ្ឋទូតចិនប្រចាំនៅអាស៊ានបានផ្តល់បទសម្ភាសន៍ជាមួយអ្នកសារព័ត៌មានថា មន្ត្រីជាន់ខ្ពស់នៃស្ថាប័នហិរញ្ញវត្ថុ សេដ្ឋកិច្ច និងអ្នកជំនាញនៃធនាគារគំនិតរបស់ប្រទេសអាស៊ាន ចិន ជប៉ុននិងកូរ៉េខាងត្បូងបានធ្វើការពិគ្រោះពិភាក្សាយ៉ាងស៊ីជម្រៅក្នុងវេទិកាលើកនេះ ព្រមទាំងបានឈានដល់គំនិតឯកភាពរួម៦ចំណុចមានជាអាទិ៍៖
ទីមួយ បណ្តាភាគីនានាបានផ្តោតសំខាន់និងផ្តល់ការគាំទ្រជាទូទៅដល់គំនិតផ្តួចផ្តើម “ខ្សែក្រវាត់មួយនិងផ្លូវមួយ” និងកិច្ចកសាងការតភ្ជាប់គ្នាក្នុងតំបន់ ហើយក៏យកចិត្តទុកដាក់ទៅលើបញ្ហាការផ្តល់សហហិរញ្ញប្បទានដល់កិច្ចកសាងហេដ្ឋារចនាសម័្ពន្ធក្នុងតំបន់ផងដែរ ។
ទីពីរ បណ្តាភាគីនានាសម្គាល់ឃើញជាទូទៅថា បណ្តាប្រទេសនានាត្រូវរួមគ្នាគាំពាររបៀបរៀបរយអន្តរជាតិនិងប្រព័ន្ធពាណិជ្ជកម្មពហុភាគីដែលចាត់ទុកច្បាប់កំណត់ជាមូលដ្ឋាន ក៏ដូចជាបង្កើនកិច្ចសហប្រតិបតិ្តការផ្តល់ផលប្រយោជន៍ដល់គ្នានិងឈ្នះ-ឈ្នះ ។
ទីបី បណ្តាភាគីនានាឯកភាពគ្នាលើបញ្ហាថាកិច្ចសហប្រតិបតិ្តការហិរញ្ញវត្ថុតំបន់អាស៊ីបូព៌ាមានសារៈសំខាន់ណាស់ចំពោះការអភិវឌ្ឍសេដ្ឋកិច្ចនិងពាណិជ្ជកម្មក្នុងតំបន់ ។
ទីបួន បណ្តាភាគីនានាផ្តួចផ្តើមជាទូទៅនូវភាពរួមបញ្ចូលគ្នានៃហិញ្ញវត្ថុតំបន់ ក្នុងន័យសម្រេចការធ្វើសមាហរណកម្មនិងកិច្ចសម្រួលសម្រាប់ការទូទាត់ពាណិជ្ជកម្មក្នុងតំបន់ ។
ទីប្រាំ បណ្តាភាគីនានាយកចិត្តទុកដាក់ជាទូទៅដល់តួនាទីវិជ្ជមាននៃទីផ្សារប័ណ្ណបំណុលរបស់ទ្វីបអាស៊ីក្នុងការជំរុញអភិវឌ្ឍសហហិរញ្ញប្បទានក្នុងតំបន់ ។
ទីប្រាំមួយ បណ្តាភាគីនានាវាយតម្លៃខ្ពស់ជាឯកច្ឆន្ទចំពោះការបង្កើតវេទិកាក្រុងហ្សាការតាស្តីពីទំនាក់ទំនងរវាងចិននិងអាស៊ាន ៕
