កាលពីថ្ងៃទី ១៦ ខែធ្នូតាមម៉ោងតំបន់ លោកវ៉ាងយី សមាជិកក្រុមប្រឹក្សាកិច្ចការរដ្ឋចិននិងជារដ្ឋមន្ត្រីការបរទេសចិនបានជួបសន្ទនាជាមួយលោកហោណាំហុង ឧបនាយករដ្ឋមន្ត្រីកម្ពុជាដែលអញ្ជើញចូលរួមសន្និសីទរដ្ឋមន្ត្រីការបរទេសលើកទី ៤ នៃកិច្ចសហប្រតិបត្តិការទន្លេឡានឆាង-ទន្លេមេគង្គនៅប្រទេសឡាវ ។
លោកវ៉ាងយីបានថ្លែងថា តាំងពីបានបង្កើតទំនាក់ទំនងផ្លូវទូត ៦០ ឆ្នាំរៀងមក ទំនាក់ទំនងរវាងប្រទេសចិននិងកម្ពុជានៅតែរក្សាភាពរឹងមាំ និងបានរក្សាកម្លាំងរស់ដ៏ខ្លាំងក្លា ។ ភាគីចិនមានឆន្ទៈរក្សាការសម្របសម្រួលនិងកិច្ចសហប្រតិបត្តិការជាយុទ្ធសាស្ត្រយ៉ាងជិតស្និទ្ធជាមួយភាគីកម្ពុជា ដើម្បីកសាងសហគមន៍រួមវាសនាដ៏មានអត្ថន័យយុទ្ធសាស្ត្ររវាងចិននិងកម្ពុជា ។
លោកវ៉ាងយីចង្អុលបង្ហាញថា ភាគីចិនគាំទ្រយ៉ាងរឹងមាំនូវកិច្ចការយុត្តិធម៌របស់ប្រទេសកម្ពុជាក្នុងការគាំពារអធិបតេយ្យភាពឯករាជ្យជាតិនិងសេចក្តីថ្លៃថ្នូររបស់ប្រជាជាតិ ហើយគាំទ្រយ៉ាងរឹងមាំចំពោះប្រទេសកម្ពុជាក្នុងការដើរតាមផ្លូវអភិវឌ្ឍដែលសមស្របនឹងសភាពការណ៍ជាតិរបស់ខ្លួន ។ យើងរីករាយរួមជាមួយភាគីកម្ពុជាក្នុងការរៀបចំឲ្យបានល្អនូវទំនាក់ទំនងកម្រិតខ្ពស់នៅដំណាក់កាលបន្ទាប់ ដើម្បីធ្វើឲ្យកិច្ចសហប្រតិបត្តិការខ្សែក្រវាត់មួយនិងផ្លូវមួយកាន់តែស៊ីជម្រៅ ផ្តល់ផលប្រយោជន៍ដល់ប្រជាជនកាន់តែច្រើន និងបង្កើនការផ្លាស់ប្តូររវាងយុវជនប្រទេសទាំងពីរ ធ្វើឲ្យមិត្តភាពចិននិងកម្ពុជាតពីមួយជំនាន់ទៅមួយជំនាន់ ។ ភាគីចិនសង្ឃឹមថានឹងធ្វើការរួមគ្នាជាមួយកម្ពុជាដើម្បីជំរុញកិច្ចសហប្រតិបត្តិការទន្លេឡានឆាង-ទន្លេមេគង្គ និងដើម្បីសម្រេចការអភិវឌ្ឍរួមគ្នា ។
លោកហោណាំហុងបានថ្លែងអំណរគុណភាគីចិនដែលបានផ្តល់ការគាំទ្រនិងការជួយឧបត្ថម្ភដោយឥតល័ក្ខខ័ណ្ឌជាច្រើនដល់ភាគីកម្ពុជា ។ សម្តេចហ៊ុនសែន នាយករដ្ឋមន្ត្រីកម្ពុជារីករាយចូលរួមវេទិកាកំពូលសម្រាប់កិច្ចសហប្រតិបត្តិការអន្តរជាតិស្តីពីគំនិតផ្តួចផ្តើមខ្សែក្រវាត់មួយនិងផ្លូវមួយលើកទី ២ នៅប្រទេសចិន ជំរុញកិច្ចសហប្រតិបត្តិការសេដ្ឋកិច្ចនិងពាណិជ្ជកម្មរវាងភាគីទាំងពីរ ពង្រីកការវិនិយោគនិងបង្កើនការទៅមករវាងមន្ត្រីនៃភាគីទាំងពីរថែមមួយកម្រិតទៀត ។ ភាគីកម្ពុជាគាំទ្រកិច្ចសហប្រតិបត្តិការទន្លេឡានឆាង-ទន្លេមេគង្គ រីករាយផ្លាស់ប្តូរនិងសម្របសម្រួលយ៉ាងជិតស្និទ្ធជាមួយភាគីចិន ដើម្បីជំរុញយន្តការនេះឲ្យទទួលបានលទ្ធផលវិជ្ជមានឥតឈប់ឈរ ៕
