លោក ស៊ី ជីនភីង ប្រធានរដ្ឋចិនបានថ្លែងក្នុងពិធីសម្ពោធបើកពិព័រណ៍នាំចូលចិនអន្តរជាតិលើកដំបូងថា ការផ្តល់ភាពងាយស្រួលនិងផ្តល់ប្រយោជន៍ដល់មនុស្សជាតិគឺជាកម្លាំងចលករដ៏មានឥទ្ធិពលបំផុតសម្រាប់ការច្នៃប្រឌិតថ្មីផ្នែកបច្ចេកវិទ្យា។
បច្ចេកវិទ្យាថ្មីនិងផលិតផលថ្មីចំនួនជាង ១០០ មកពីទូទាំងពិភពលោកបានចេញមុខលើឆាកអន្តរជាតិជាលើកដំបូងតាមរយៈពិព័រណ៍នាំចូលចិនអន្តរជាតិនេះ ។ មូលហេតុដែលអង្គការស្រាវជ្រាវនិងអ្នកផលិតនៃប្រទេសនីមួយៗជ្រើសរើសពិព័រណ៍នាំចូលចិនអន្តរជាតិជាឱកាសបង្ហាញមុខលើកដំបូងនៃផលិតផលដែលបានប្រើបច្ចេកវិទ្យាស្នូលរបស់ខ្លួន គឺដោយសារពួកគេមិនត្រឹមតែចាប់អារម្មណ៍លើទីផ្សារចិនដ៏ធំសម្បើមប៉ុណ្ណោះទេ ថែមទាំងបានឃើញពីការខិតខំប្រឹងប្រែងនិងសមទ្ធិផលដ៏ច្បាស់នៃការការពារកម្មសិទ្ធិបញ្ញារបស់ប្រទេសចិន។
បច្ចុប្បន្ននេះ ប្រទេសចិនបានឈានចូលក្នុងលំដាប់ថ្នាក់មុន ២០ នៃសន្ទស្សន៍ច្នៃប្រឌិតថ្មីទូទាំងពិភពលោកឆ្នាំ ២០១៨ នៃអង្គការកម្មសិទ្ធិបញ្ញាពិភពលោក ហើយការច្នៃប្រឌិតថ្មីបានក្លាយជាកម្លាំងចលករដ៏សំខាន់សម្រាប់ការអភិវឌ្ឍដែលមានគុណភាពខ្ពស់របស់ប្រទេសចិន។ លោក Bill Gates ដែលបានអញ្ជើញចូលរួមវេទិកាសេដ្ឋកិច្ចនិងពាណិជ្ជកម្មអន្តរជាតិ Hongqiao បានថ្លែងថា ក្នុងវិស័យឥទ្ធិពលលើពិភពលោក សមទ្ធិផលផ្នែកច្នៃប្រឌិតថ្មីជាច្រើនរបស់ចិនមិនត្រឹមតែអាចបម្រើខ្លួនឯងប៉ុណ្ណោះទេ ថែមទាំងបម្រើដល់ពិភពលោកផងដែរ។
ព្រមពេលជាមួយនេះ ចិនបានចូលរួមស្ទើរតែទាំងអស់ក្នុងអនុសញ្ញាអន្តរជាតិស្តីពីកម្មសិទ្ធិបញ្ញាសំខាន់ៗលើពិភពលោក ហើយចំនួននៃការដាក់ពាក្យចុះបញ្ជីពាណិជ្ជកម្ម (ស្លាកយីហោ) របស់ចិនត្រូវបានជាប់ចំណាក់ថ្នាក់ទី ១ ជាប់ៗគ្នាលើសកលលោកក្នុងរយៈពេល ១៦ ឆ្នាំកន្លងមក, ហើយសម្រាប់ចំនួនស្នើសុំប្រកាសនីយបត្រតក្កកម្មវិញ ចិនជាប់ចំណាត់ថ្នាក់ទី១លើពិភពលោកក្នុងរយៈពេល ៧ ឆ្នាំជាប់ៗគ្នាផងដែរ។ នៅពេលជាមួយគ្នានេះដែរ ចិនក៏បានបង្កើនការធានារ៉ាប់រងទៅលើស្មារតីច្នៃប្រឌិតថ្មីពីវិស័យច្បាប់ផងដែរ។
អំឡុងការត្រៀមរៀបចំពិព័រណ៍នាំចូលចិនអន្តរជាតិនេះ ពាណិជ្ជករនៃបណ្តាប្រទេសនានាបានចាប់អារម្មណ៍ទៅលើអាកប្បកិរិយានិងសកម្មភាពនៃការការពារកម្មសិទ្ធិបញ្ញារបស់ប្រទេសចិន។ ដោយសារចិនបានសន្យាជាមួយបណ្តាពាណិជ្ជករដែលចុះឈ្មោះចូលរួមពិព័រណ៍ នូវល័ក្ខខ័ណ្ឌអំពីការពារកម្មសិទ្ធិបញ្ញា។ ក្នុងអំឡុងពេលបើកពិព័រណ៍ ក្រុមរៀបចំបានបង្កើតមជ្ឈមណ្ឌលការពារសេវាកម្មដើម្បីដោះស្រាយជម្លោះពាណិជ្ជកម្មនិងការពារកម្មសិទ្ធិបញ្ញា ដើម្បីការពារសិទ្ធិនិងផលប្រយោជន៍ស្របច្បាប់របស់ភាគីដែលមានពាក់ព័ន្ធ។ ក្រៅពីនេះ មជ្ឈមណ្ឌលនេះក៏ផ្តល់ការណែនាំចំពោះការដាក់ពាក្យស្នើសុំនិងទទួលបានសេវាការពារកម្មសិទ្ធិបញ្ញាក្នុងប្រទេសចិនផងដែរ។ វិធានការទាំងនេះបានបង្កើតនូវបរិយាកាសល្អប្រសើរដល់ការចូលរួមពិព័រណ៍។
អ្វីដែលគួរឲ្យពាណិជ្ជករប្រទេសនានាចាប់អារម្មណ៍នោះ គឺសុន្ទរកថាគន្លឹះរបស់លោកស៊ីជីនភីង ប្រធានរដ្ឋចិននៅក្នុងពិធីសម្ពោធពិព័រណ៍នាំចូលចិនអន្តរជាតិ ។ ពេលថ្លែងសុន្ទរកថា លោកបានសន្យាថានឹងបង្កើតបរិយាកាសធ្វើអាជីវកម្មថា្នក់ពិភពលោកឲ្យល្អបំផុត ដោយដាក់ចេញនូវវិធានការរួមមានការដាក់ពិន័យតាមច្បាប់យ៉ាងតឹងរ៉ឹងទៅលើអំពើរំលោភសិទ្ធិនិងផលប្រយោជន៍ស្របច្បាប់របស់ពាណិជ្ជករបរទេស ជាពិសេសចំពោះអំពើរំលោភកម្មសិទ្ធិបញ្ញា លើកកម្ពស់គុណភាពនិងប្រសិទ្ធភាពនៃការពិនិត្យកម្មសិទ្ធិបញ្ញា ព្រមទាំងប្រើប្រាស់ប្រព័ន្ធពិន័យជាប្រាក់សំណង ដើម្បីបង្កើនប្រាក់សំណងនៅពេលធ្វើសកម្មភាពខុសច្បាប់ ។ នេះច្បាស់ជានឹងធ្វើឲ្យសមិទ្ធផលបញ្ញាពិភពលោកទទួលបានការការពារកាន់រតែល្អក្នុងប្រទេសចិន និងធ្វើឲ្យពាណិជ្ជករបរទេសកាន់តែមានទំនុកចិត្តក្នុងការធ្វើវិនិយោគ ការស្រាវជ្រាវនិងផលិតថែមទាំងប្រើប្រាស់បច្ចេកវិទ្យានៅប្រទេសចិន ដើម្បីចែករំលែកកាលានុវត្តភាពនៃការអភិវឌ្ឍរបស់ប្រទេសចិន ។
សន្និបាតស្តីពីការការពារនិងការអភិវឌ្ឍដោយច្នៃប្រឌិតថ្មីនៃកម្មសិទ្ធិបញ្ញាពិភពលោកបានប្រារព្ធឡើងក្នុងពិព័រណ៍នាំចូលចិនអន្តរជាតិកាលពីថ្ងៃទី ៦ ខែវិច្ឆិកា ។ នេះបានបង្ហាញពីទំនួលខុសត្រូវនិងការទទួលរ៉ាប់រងរបស់ចិនក្នុងការការពារកម្មសិទ្ធិបញ្ញាពិភពលោក ។
សព្វថ្ងៃនេះ ពិព័រណ៍នាំចូលចិនអន្តរជាតិកំពុងដំណើរការយ៉ាងកក់ក្តៅ ។ ពិព័រណ៍នេះគឺចាប់ដំណើរការនូវយុគសម័យថ្មីនៃការការការពារកម្មសិទ្ធិបញ្ញាពិភពលោក ៕
