ថ្ងៃទី ៦ ខែមិថុនា វេទិកាឧស្សាហកម្មនិងពាណិជ្ជកម្មនៃអង្គការសហប្រតិបត្តិការសៀងហៃបានប្រារព្ធធ្វើឡើងនៅក្រុងប៉េកាំង តំណាងមកពីសមាគមឧស្សាហកម្មនិងពាណិជ្ជកម្មនិងសហគ្រិនចំនួនប្រហែល ៣០០ នាក់ ដែលមកពីប្រទេសចិន រុស្ស៊ី ឥណ្ឌា ប៉ាគីស្ថាន កាហ្សាស្ថាន អ៊ូសបេគីស្ថាន តាជីគីស្ថាន កៀហ្ស៊ីស៊ីស្ថានជាដើមបានអញ្ជើញចូលរួម។
លោក Chen Zhou អនុប្រធានសមាគមជំរុញពាណិជ្ជកម្មប្រទេសចិនបានថ្លែងក្នុងពិធីបើកវេទិកាថា សម្រាប់ពិសេសឆ្នាំនេះប្រទេសចិននឹងរៀបចំពិព័រណ៍នាំចូលអន្តរជាតិចិនលើកទីមួយនៅទីក្រុងសៀងហៃ សង្ឃឹមថាមជ្ឈដ្ឋានឧស្សាហកម្មនិងពាណិជ្ជកម្មនៃប្រទេសជាសមាជិកអង្គការសហប្រតិបត្តិការសៀងហៃនឹងចូលរួមយ៉ាងសកម្ម។
លោក Khemka ប្រធានគណៈកម្មាធិការសហគ្រាសឧស្សាហកម្មឥណ្ឌាបានថ្លែងក្នុងវេទិកាថា ឥឡូវនេះ បញ្ហាធំបំផុតដែលសហគ្រាសសេដ្ឋកិច្ចឥណ្ឌាកំពុងប្រឈមមុខគឺឱកាសការងារ ។ ការដែលចូលរួមអង្គការសហប្រតិបត្តិការសៀងហៃ នឹងជួយបង្កើតឱកាសការងារកាន់តែច្រើនទៀតក្នុងវិស័យកិច្ចសហប្រតិបត្តិការពាណិជ្ជកម្ម ការអភិវឌ្ឍសហគ្រាសធុនតូចនិងមធ្យមជាដើម ដើម្បីជំរុញឲ្យតំបន់ទាំងមូលរួមគ្នាចែករំលែកនូវវិបុលភាពនិងស្ថិរភាព៕
