លោកស៊ីជីនភីង ប្រធានរដ្ឋចិនជួបសន្ទនាការងារជាមួយលោកDuterte ប្រធានាធិបតីហ្វិលីពីន

ថៃ្ងទី១១ ខែវិច្ឆិកា លោកស៊ីជីនភីង ប្រធានរដ្ឋចិនបានជួបសន្ទនាការងារជាមួយលោកDuterte ប្រធានាធិបតីហ្វីលីពីននៅក្រុងដាណាងប្រទេសវៀតណាម។

លោកស៊ីជីនភីងបានថែ្លងថា តាំងពីលោកប្រធានាធិបតី Duterteបានបំពេញទស្សនកិច្ចផ្លូវរដ្ឋនៅប្រទេសចិនកាលពីខែតុលា ឆ្នាំ២០១៦កន្លងទៅនេះ ទំនាក់ទំនងរវាងចិននិងហ្វីលីពីនបានបើកទំព័រថ្មីហើយ។ភាគីទាំងពីរបានធ្វើកិច្ចសហប្រតិបត្តិការយ៉ាងវិជ្ជមាន ទំនាក់ទំនងរវាងប្រទេសទាំងពីរអភិវឌ្ឍន៍ទៅមុខដោយមានភាពស្អាតស្អំនិងមានស្ថិរភាពព្រមទាំងបានផ្តល់ផលប្រយោជន៍ជាក់ស្តែងដល់ប្រជាជននៃប្រទេសទាំងពីរ ហើយបានរួមវិភាគទានសំខាន់ដល់សន្តិភាពនិងស្ថិរភាពនៃតំបន់ផងដែរ។ភាគីចិនរីករាយជាមួយភាគីហ្វីលីពីន បន្តបង្កើនជំនឿទុកចិត្តគ្នាខាងនយោបាយ ពង្រឹងកិច្ចសហប្រតិបត្តិការឲ្យស៊ីជម្រៅដើម្បីទទួលបានសមិទ្ធិផលកាន់តែច្រើនសម្រាប់ផ្តល់ផលប្រយោជន៍ដល់ប្រជាជននៃប្រទេសទាំងពីរ។

លោកDuterte បានថែ្លងថា ទំនាក់ទំនងរវាងហ្វីលីពីននិងចិនមានសារសំខាន់យ៉ាងក្រៃលែង។ភាគីហ្វីលីពីនបានខិតខំព្យាយាមជំរុញកិច្ចសហប្រតិបត្តិការលើគ្រប់វិស័យរវាងប្រទេសទាំងពីរឲ្យអភិវឌ្ឍទៅមុខ ហើយរីករាយរួមជាមួយភាគីចិន អនុវត្តតាមមតិដែលបានឯកភាពដោយភាគីទាំងពីរដើម្បីដោះស្រាយបញ្ហាលើសមុទ្រឲ្យបានល្អនិងដោយសមរម្យ៕