១៦ - រាជរដ្ឋាភិបាលលោកស្រីយីងឡាក់ប្រទេសថៃប្រឈមនឹងវិបត្តិនយោបាយធ្ងន់ធ្ងរបំផុតតាំងពីលោកស្រីចូលកាន់តំណែងរៀងមក

ថ្ងៃទី ១១ ខែវិច្ឆិកា សភាជាន់ក្រោមនៃរដ្ឋសភាថៃបានអនុម័តនូវសេចក្តីព្រាងច្បាប់អំពីការលើកលែងទោសដែលដាក់ជូនដោយបក្សភឿថៃជាបក្សកាន់អំណាច។ បន្ទាប់ពីនោះ បក្សប្រឆាំងដែលបានធ្វើបាតុកម្មចាប់ពីខែសីហាកន្លងមកនោះបានប្រកាសនឹងធ្វើបាតុកម្មដែលមានរយៈពេលយូរនៅតាមដងវិថីក្រុងបាងកក។ ពួកគេសម្គាល់ថា សេចក្តីព្រាងច្បាប់អំពីការលើកលែងទោសប្រហែលនឹងក្រាលផ្លូវសម្រាប់លោកថាស៊ីនអតីតនាយករដ្ឋមន្រ្តីឲ្យវិលចូលស្រុកវិញ។ក្រោយពីធ្វើបាតុកម្ម ការទាមទារឲ្យដកចេញនូវសេចក្តីព្រាងច្បាប់អំពីការលើកលែងទោសបានប្រែទៅជាការផ្តួលរំលំរាជរដ្ឋាភិបាលលោកស្រីយីងឡាក់វិញ។នៅថ្ងៃទី៣ ខែធ្នូ លោកSuthep Thuagsubanអ្នកដឹកនាំនៃការធ្វើមីទីងប្រឆាំងរាជរដ្ឋាភិបាលបានផ្តួចផ្តើមនូវការបង្កើតរដ្ឋសភាប្រជាជនមួយ ហើយជ្រើសរើសនាយករដ្ឋមន្រ្តីថ្មីនិងបង្កើតរាជរដ្ឋាភិបាលបណ្តោះអាសន្ន រួចហើយធ្វើការបោះឆ្នោតសកលជាថ្មីម្តងទៀត ដោយកំចាត់ចោលទាំងស្រុងនូវកម្លាំងរបស់លោកថាស៊ីននិងលោកស្រីយីងឡាក់ក្នុងផ្នែកនយោបាយរបស់ប្រទេសថៃ។ថ្ងៃទី៩ ខែធ្នូ លោកស្រីយីងឡាក់បានប្រកាសរំសាយសភាជាន់ក្រោមនៃរដ្ឋសភា។ការបោះឆ្នោតជ្រើសរើសសមាជិកនៃសភាជាន់ក្រោមនៃរដ្ឋសភាអាណត្តិថ្មីនឹងត្រូវរៀបចំធ្វើនៅថ្ងៃទី២ខែកុម្ភៈឆ្នាំ ២០១៤ ។