លោករដ្ឋមន្រ្តីការបរទេសចិនថ្លែងថាត្រូវធ្វើឲ្យទំនាក់ទំនាងរវាងចិននិងប៉ាគីស្ថានរឹងមាំដូចជាដែកមិនច្រែះចាប់ជារៀងរហូតនិងលត់ដំឲ្យទៅជាដែកថែប

លោកWangYiសមាជិកក្រុមប្រឹក្សាកិច្ចការរដ្ឋចិននិងជារដ្ឋមន្រ្តីការបរទេសចិនបានជួបពិភាក្សាការងារជាមួយលោកKhawajaAsifរដ្ឋមន្រ្តីការបរទេសប៉ាគីស្ថានដែលទៅបំពេញទស្សនកិច្ចនៅប្រទេសចិននៅថ្ងៃទី២៣ខែមេសា។ភាគីទាំងពីរបានឯកភាពគ្នាថា ទំនាក់ទំនងភាពជាដៃគូយុទ្ធសាស្រ្តគ្រប់កាលៈទេសៈរវាងចិននិងប៉ាគីស្ថានគឺជាទ្រព្យសម្បត្តិដ៏មានតម្លៃរបស់ប្រទេសទាំងពីរ ប្រទេសទាំងពីរនឹងបន្តចាត់ទុកការអភិវឌ្ឍទំនាក់ទំនងទ្វេភាគីនាពេលអនាគតជាទិសដៅអាទិភាពនៃគោលនយោបាយចំពោះក្រៅប្រទេស ធ្វើឲ្យការសម្របសម្រួលនិងសហការគ្នាក្នុងកិច្ចការអន្តរជាតិនិងកិច្ចការតំបន់មានភាពជិតស្និទ្ធ ជំរុញថែមទៀតនូវកិច្ចកសាងទំនាក់ទំនងអន្តរជាតិបែបថ្មី បង្កើតសហគមន៍រួមវាសនាតែមួយរវាងចិននិងប៉ាគីស្ថានដែលកាន់តែល្អិតល្មួត។

បន្ទាប់ពីបញ្ចប់កិច្ចជំនួបពិភាក្សា លោកWangYiនិងលោកKhawajaAsifបានរួមគ្នាជួបជាមួយអ្នកសារព័ត៌មាន លោកWangYiបានថ្លែងថា ភាគីទាំងពីរបានផ្លាស់ប្តូរមតិយោបល់យ៉ាងស៊ីជម្រៅជុំវិញកិច្ចសហប្រតិបត្តិការផ្នែកសេដ្ឋកិច្ចពាណិជ្ជកម្ម សន្តិសុខជាដើមរវាងចិននិងប៉ាគីស្ថាន ដោយបានបញ្ជាក់ច្បាស់ថាភាគីទាំងពីរនឹងរួមគ្នាគាំពារប្រព័ន្ធពាណិជ្ជកម្មជាសកលដែលមានអង្គការពាណិជ្ជកម្មពិភពលោកជាស្នូល ប្រកាន់ខ្ជាប់ទិសដៅអភិវឌ្ឍន៍ដែលបង្កើនការសម្របសម្រួលនិងសហការគ្នាក្រោមក្របខ័ណ្ឌអង្គការសហប្រតិបត្តិការសៀងហៃ។ភាគីចិនបានសូមកោតសរសើរខ្ពស់នូវការខិតខំប្រឹងប្រែងរបស់ភាគីប៉ាគីស្ថានក្នុងការបង្រ្កាបភេរវនិយម ព្រមទាំងរីករាយក្នុងការផ្តល់ការគាំទ្រនិងជំនួយយ៉ាងសកម្មដល់ប៉ាគីស្ថានផងដែរ។