ពីថ្ងៃទី ២០ ដល់ទី ២១ ខែមេសា សនិ្នសីទការងារសុវត្ថិភាពបណ្តាញអ៊ីនធឺណែតនិងព័ត៌មានវិទ្យាទូទាំងប្រទេសចិនបានប្រារព្វធ្វើនៅក្រុងប៉េកាំង ។ លោក ស៊ីជីនភីង ប្រធានរដ្ឋចិននិងជាប្រធានគណៈកម្មាធិការសុវត្ថិភាពបណ្តាញអ៊ីនធឺណែតនិងព័ត៌មានវិទ្យាមជ្ឈិមចិនបានចូលរួមសនិ្នសីទព្រមទាំងបានថ្លែងសុន្ទរកថាគន្លឹះផងដែរ ។
ថ្លែងក្នុងសុន្ទរកថា លោក ស៊ីជីនភីង បានគូសបញ្ជាក់ថា ការធ្វើព័ត៌មានភាវូបនីយកម្មបាននាំមកនូវកាលានុវត្តភាពកម្រមានដល់ប្រជាជាតិចិន ។ ប្រទេសចិនត្រូវក្តាប់ជាប់ដោយវាងវៃនូវកាលានុវត្តភាពជាប្រវត្តិសាស្ត្រនៃការអភិវឌ្ឍព័ត៌មានវិទ្យា បង្កើនការផ្សាយព័ត៌មានវិជ្ជមានលើបណ្តាញអ៊ីនធឺណែត គាំពារសុវត្ថិភាពលើបណ្តាញអ៊ីនធឺណែត និងជំរុញការវាយទម្លុះខាងផ្នែកបច្ចេកវិទ្យាជាគន្លឹះលើវិស័យព័ត៌មានវិទ្យា ពង្រីកតួនាទីណែនាំរបស់ព័ត៌មានវិទ្យាទៅលើការអភិវឌ្ឍសេដ្ឋកិច្ចសង្គម បង្កើនការរួមបញ្ចូលគ្នារវាងផ្នែកយោធានិងស៊ីវិលលើវិស័យបណ្តាញអ៊ីនធឺណែតនិងព័ត៌មានវិទ្យា ផ្តើមគំនិតចូលរួមដំណើរវិវឌ្ឍន៍គ្រប់គ្រងបណ្តាញអ៊ីនធឺណែតអន្តរជាតិ ក៏ដូចជាច្នៃប្រឌិតថ្មីដោយម្ចាស់ការសម្រាប់ជំរុញកិច្ចកសាងប្រទេសខ្លាំងខាងបណ្តាញអ៊ីនធឺណែត ក្នុងន័យរួមចំណែកថ្មីក្នុងការតស៊ូប្តូរផ្តាច់ដើម្បីសម្រេចបាននូវកិច្ចកសាងសង្គមដែលប្រជាជនមានជីវភាពធូរធារបង្គួរដោយគ្រប់ជ្រុងជ្រោយ និងដណ្តើមយកជ័យជម្នះដ៏មហិមានៃសង្គមនិយមមានលក្ខណៈពិសេសនៃប្រទេសចិនក្នុងយុគសម័យថ្មី ព្រមនិងសម្រេចបាននូវសុបិនប្រទេសចិនដែលស្តារភាពរុងរឿងថ្កុំថ្កើងដ៏មហិមារបស់ប្រជាជាតិចិនផងដែរ ៕
