ថ្ងៃទី២១ខែមេសា លោកលូខាង អ្នកនាំពាក្យនៃក្រសួងការបរទេសចិនបាន ថ្លែងកថាអំពីការសម្រេចចិត្តរបស់កូរ៉េខាងជើងស្តីពីការបញ្ឈប់ការសាកល្បងមីស៊ីលនុយគ្លែអ៊ែរនិងខិតខំអភិវឌ្ឍសេដ្ឋកិច្ចដោយពេញទំហឹង។
លោកលូខាងថ្លែងថា កូរ៉េខាងជើងបានធ្វើសេចក្តីសម្រេចចិត្តថានឹងបញ្ឈប់ការសាកល្បងមីស៊ីលនុយគ្លែអ៊ែរនិងខិតខំអភិវឌ្ឍសេដ្ឋកិច្ចដោយពេញទំហឹងដើម្បីលើកកម្ពស់កម្រិតជីវភាពរស់នៅរបស់ប្រជាជន ភាគីចិនសូមសំដែងការស្វាគមន៍ចំពោះរឿងនេះ។
ភាគីចិនសម្គាល់ថា សេចក្តីសម្រេចចិត្តរបស់ភាគីកូរ៉េខាងជើងបែបនេះគឺមានអំណោយផលដល់ការបន្ធូរបន្ថយថែមទៀតនូវស្ថានការណ៍តានតឹងនៅឧបទ្វីបកូរ៉េ និងមានអំណោយផលដល់ការជំរុញដំណើរវិវឌ្ឍនៃការគ្មានអាវុធនុយគ្លែអ៊ែរនិងដោះស្រាយបញ្ហានយោបាយនៃឧបទ្វីកូរ៉េផងដែរ។ ឯការសម្រេចបាននូវ ការគ្មានអាវុធនុយគ្លែអ៊ែរនៅឧបទ្វីបកូរ៉េនិងរក្សាសន្តិភាពយូរអង្វែងក្នុងតំបន់ វាសមស្របនឹងផលប្រយោជន៍រួមរបស់ប្រជាជននៃឧបទ្វីបកូរ៉េនិងក្នុងតំបន់ ហើយក៏ជាក្តីរំពឹងទូទៅនៃ សហគមន៍អន្តរជាតិផងដែរ។
លោកលូខាងរំពឹងថាបណ្តាភាគីពាក់ព័ន្ធនានាអាចចាត់ប្រតិបត្តិការជាក់ស្តែង ធ្វើកិច្ចខិតខំប្រឹងប្រែងតាមតួនាទីរបស់ខ្លួនក្នុងន័យសម្រេចសន្តិភាពយូរអង្វែងនិងការអភិវឌ្ឍរួមក្នុងតំបន់។ ភាគីចិននឹងបន្តដើរតួនាទីយ៉ាងសកម្មក្នុងរឿងនេះតទៅទៀត៕