សមត្ថកិច្ចប៉ូលិសនៃប្រទេសឥណ្ឌូនេស៊ីកំពុងស្រាវជ្រាវយ៉ាងស៊ីជម្រៅអំពីកម្មវិធីប្រើប្រាស់ដែលពាក់ព័ន្ធនឹងបណ្តាញទំនាក់ទំនងសង្គម Facebook ក្នុងគោលបំណងធ្វើការស៊ើបអង្កេតថា តើមានបទល្មើសលួចយកព័ត៌មានបុគ្គលរបស់អ្នកប្រើប្រាស់នៃប្រទេសឥណ្ឌូនេស៊ីឬយ៉ាងណា ។
ប្រព័ន្ធសារព័តមានឥណ្ឌូនេស៊ីបានផ្សាយដំណឹងឲ្យដឹងថា តាមដំណឹងនៃទីភ្នាក់ងារសារព័ត៌មាន Reuters នៃប្រទេសអង់គ្លេស នៅថ្ងៃអង្គារនេះ ក្នុងសវនាការរបស់រដ្ឋសភាប្រទេសឥណ្ឌូនេស៊ី តំណាងនៃក្រុមហ៊ុន Facebookប្រចាំនៅឥណ្ឌូនេស៊ីទទួលបានការសួរដេញដោលអស់រយៈពេល៥ម៉ោងអំពីការបែកធ្លាយព័ត៌មានបុគ្គលរបស់អ្នកប្រើប្រាស់ តំណាងរូបនេះក៏បានសុំអភ័យទោសចំពោះរឿងដែលព័ត៌មានបុគ្គលរបស់អ្នកប្រើប្រាស់នៃប្រទេសឥណ្ឌូនេស៊ីចំនួនជាង១លាននាក់ប្រហែលនឹងត្រូវគេលួចយកទៅប្រើប្រាស់ដោយខុសច្បាប់នោះ ៕