ថ្ងៃទី ១៨ ខែមេសា វេទិកាសហប្រតិបតិ្តការអន្តរជាតិបីប្រទេស ចិន ជប៉ុននិងកូរ៉េខាងត្បូងឆ្នាំ ២០១៨ បានប្រារព្វធ្វើនៅក្រុងតូក្យូ រាជធានីប្រទេសជប៉ុន ។ វេទិកាលើកនេះបើកធ្វើក្រោមប្រធានបទ "ចារទំព័រថ្មីស្តីពីកិច្ចសហប្រតិបតិ្តការរវាងប្រទេសទាំង ៣ រំលឹកឡើងវិញពី១ទសវត្សរ៍កន្លងទៅ និងសម្លឹងមើល១ទសវត្សរ៍នាពេលអនាគត" ។ លោក Dai Bingguo អតីតសមាជិកក្រុមប្រឹក្សាកិច្ចការរដ្ឋចិនបានអញ្ជើញចូលរួមពិធីសម្ពោធបើកព្រមទាំងថ្លែងសុន្ទរកថាគន្លឹះផងដែរ ។
ថ្លែងក្នុងសុន្ទរកថា លោក Dai Bingguo បានលើកឡើងថា តាំងពីចិន ជប៉ុននិងកូរ៉េខាងត្បូងបានចាប់ផ្តើមធ្វើកិច្ចសហប្រតិបតិ្តការមក ប្រទេសទាំងបីបានបង្កើតយន្តការសហប្រតិបតិ្តការដែលមានលក្ខណៈសម្បតិ្តពេញលេញ ទទួលបានផ្លែផ្កាគួរឲ្យកត់សម្គាល់ ព្រមទាំងបានរួមចំណែកយ៉ាងសកម្មដើម្បីលំនឹងស្ថានការណ៍អាស៊ីបូព៌ា និងជំរុញការអភិវឌ្ឍក្នុងតំបន់ ក៏ដូចជាបានជំរុញយ៉ាងខ្លាំងក្លានូវដំណើរវិវឌ្ឍនៃកិច្ចសហប្រតិបតិ្តការអាស៊ីបូព៌ាផងដែរ ៕