ក្នុងសន្និសីទកាសែតជាប្រចាំដែលបើកធ្វើនៅក្រុងប៉េកាំងកាលពីថ្ងៃទី១៨ខែមេសា លោកស្រីHuaChunyingអ្នកនាំពាក្យក្រសួងការបរទេសចិនបានប្រកាសថា សន្និសីទក្រុមប្រឹក្សារដ្ឋមន្រ្តីការបរទេសនៃប្រទេសជាសមាជិកអង្គការសហប្រតិបត្តិការសៀងហៃនឹងបើកធ្វើនៅក្រុងប៉េកាំងនៅថ្ងៃទី២៤ខែមេសាខាងមុខ។
តាមការឧទ្ទេសនាមរបស់លោកស្រីHuaChunyingបានឲ្យដឹងថា សន្និសីទលើកនេះគឺជាសន្និសីទក្រុមប្រឹក្សារដ្ឋមន្រ្តីការបរទេសនៃប្រទេសជាសមាជិកអង្គការសហប្រតិបត្តិការសៀងហៃលើកដំបូងបន្ទាប់ពីអង្គការនេះបានបន្ថែមសមាជិករបស់ខ្លួនកាលពីឆ្នាំ២០១៧។សន្និសីទលើកនេះគឺធ្វើឡើងដើម្បីត្រៀមរៀបចំដោយគ្រប់ជ្រុងជ្រោយសម្រាប់ការបើកធ្វើសន្និសីទកំពូលនៅក្រុងឈីងតាវដែលនឹងប្រារព្ធឡើងនៅខែមិថុនាខាងមុខ។តាមសេចក្តីអញ្ជើញរបស់លោកវ៉ាងអ៊ី សមាជិកក្រុមប្រឹក្សាកិច្ចការរដ្ឋនិងជារដ្ឋមន្រ្តីការបរទេសចិន រដ្ឋមន្រ្តីការបរទេសចំនួន៧រូបផ្សេងទៀតនៃប្រទេសជាសមាជិកនៃអង្គការសហប្រតិបត្តិការសៀងហៃនិងមន្រ្តីជាច្រើនរូបទៀតនៃអង្គការមួយនេះនឹងមានវត្តមានក្នុងសន្និសីទលើកនេះ៕