ថ្ងៃទី១៧ខែមេសា នៅទីស្តីការរដ្ឋចុងណានហៃក្រុងប៉េកាំង លោកវ៉ាងឈីសានអនុប្រធានរដ្ឋចិនបានជួបពិភាក្សាជាមួយគណៈប្រតិភូបក្សកុម្មុយនិស្តវៀតណាមដែលដឹកនាំដោយលោកNguyen Van Binhសមាជិកការិយាល័យនយោបាយ លេខាធិការនៃលេខាធិការដ្ឋានមជ្ឈិមបក្សនិងជារដ្ឋមន្រ្តីក្រសួងសេដ្ឋកិច្ចនៃគណៈកម្មាធិការមជ្ឈិមបក្សកុម្មុយនិស្តវៀតណាម។
ក្នុងកិច្ចជំនួប លោកវ៉ាងឈីសានបានថ្លែងថា ប្រទេសចិននិងវៀតណាមជាប្រទេសជិតខាងកាន់របបសង្គមនិយមដែលមានទឹកដីតភ្ជាប់គ្នា ពោលគឺជាសហគមន៍រួមវាសនាតែមួយដែលប្រកបដោយអត្ថន័យជាយុទ្ធសាស្រ្ត កិច្ចសហប្រតិបត្តិការរវាងប្រទេសទាំងពីរមានសក្តានុពលយ៉ាងធំធេង។ភាគីទាំងពីរត្រូវអនុវត្តឲ្យបានល្អនូវគំនិតឯកភាពដ៏សំខាន់របស់ថ្នាក់ដឹកនាំប្រទេសទាំងពីរ ក្នុងន័យបង្កបង្កើតជាបរិយាកាសដ៏ល្អប្រសើរ ដើម្បីធ្វើឲ្យទំនាក់ទំនងភាពជាដៃគូសហប្រតិបត្តិការជាយុទ្ធសាស្រ្តគ្រប់ជ្រុងជ្រោយរវាងចិននិងវៀតណាមទទួលបានការវិវឌ្ឍរីកចម្រើនឥតឈប់ឈរ។
ជាការឆ្លើយតប លោកNguyen Van Binhបានថ្លែងថា ការកែទម្រង់និងបើកទូលាយនៃប្រទេសចិនទទួលបានសមិទ្ធផលយ៉ាងធំធេងដែលបានផ្តល់ជាបទពិសោធន៍ដ៏មានអត្ថប្រយោជន៍សម្រាប់ប្រទេសវៀតណាមយកគំរូតាម ប្រទេសវៀតណាមរីករាយក្នុងការបន្តធ្វើឲ្យស៊ីជម្រៅនូវកិច្ចសហប្រតិបត្តិការជាក់ស្តែងលើវិស័យនានារវាងភាគីទាំងពីរ៕
