ថ្ងៃទី១៦ខែមេសា លោកស៊ីនហ្សូ អាបេនាយករដ្ឋមន្រ្តីជប៉ុនបានជួបពិភាក្សាការងារជាមួយលោកវ៉ាងអ៊ីសមាជិកក្រុមប្រឹក្សាកិច្ចការរដ្ឋនិងជារដ្ឋមន្រ្តីការបរទេសចិននៅក្រុងតូក្យូ។
ក្នុងកិច្ចជំនួប លោកវ៉ាងអ៊ីបានថ្លែងថា ចិននិងជប៉ុនជាប្រទេសជិតខាងដ៏សំខានរវាងគ្នានិងគ្នា។ ប៉ុន្មានឆ្នាំចុងក្រោយនេះ ទំនាក់ទំនងរវាងប្រទេសទាំងពីរបានឆ្លងកាត់ភាពបត់បែងមួយចំនួន ជាហេតុនាំឲ្យកិច្ចសហប្រតិបត្តិការលើគ្រប់វិស័យបានរងផលប៉ះពាល់។ ចាប់ពីឆ្នាំ២០១៧មក លោកនាយករដ្ឋមន្រ្តីបានបញ្ចេញសញ្ញាវិជ្ជមានជាច្រើនលើកសម្រាប់ការកែលម្អទំនាក់ទំនងរវាងចិននិងជប៉ុន ភាគីចិនបានផ្តោតការយកចិត្តទុកដាក់ខ្ពស់ចំពោះប្រការនេះ។ រំពឹងថាក្រោមកិច្ចខិតខំប្រឹងប្រែងរួមរបស់ភាគីទាំងពីរ ដំណើរទស្សនកិច្ចរបស់ខ្ញុំតាមការអញ្ជើញរបស់លោកនាយករដ្ឋមន្ត្រីលើកនេះអាចក្លាយជាជំហានដ៏សំខាន់មួយសម្រាប់ស្តារទំនាក់ទំនងរវាងប្រទេសយើងទាំងពីរឲ្យវិលត្រឡប់ទៅរកផ្លូវប្រក្រតីវិញ។
ជាការឆ្លើយតប លោកស៊ីនហ្សូ អាបេបានថ្លែងថា ប្រទេសជប៉ុនផ្តោតការយកចិត្តទុកដាក់ខ្ពស់ទៅលើទំនាក់ទំនងជាមួយប្រទេសចិន រីករាយចាត់ទុកខួបទី៤០នៃការចុះហត្ថលេខាលើកិច្ចព្រមព្រៀងសន្តិភាពនិងមេត្រីភាពរវាងជប៉ុននិងចិនជាកាលានុវត្តភាពដើម្បីជំរុញទំនាក់ទំនងរវាងប្រទេសទាំងពីរឲ្យទទួលបានការកែលម្អដោយគ្រប់ជ្រុងជ្រោយ សម្រេចការប្រាស្រ័យទាក់ទងជាន់ខ្ពស់ ព្រមនិងធ្វើកិច្ចសហប្រតិបត្តិការកាន់តែទូលំទូលាយក្រោមក្របខ័ណ្ឌនៃ ទំនាក់ទំនងដែលផ្តល់ផលប្រយោជន៍ដល់គ្នាជាយុទ្ធសាស្ត្រ៕