ព្រឹកព្រលឹមថ្ងៃទី ១៤ ខែមេសាតាមម៉ោងតំបន់ គោលដៅជាច្រើនកន្លែងនៃរដ្ឋាភិបាលនិងផ្នែកយោធាក្នុងទឹកដីស៊ីរីស្រាប់តែរងការវាយប្រហាររួមតាមអាកាសពីប្រទេសអាមេរិក អង់គ្លេសនិងបារាំង បច្ចុប្បន្ននៅមិនអាចបញ្ជាក់ពីសភាពការណ៍ស្លាប់និងរបួសរបស់មនុស្សនិងការខូចខាតនៃសំណង់បានទេ ។ សហគមន៍អន្តរជាតិយកចិត្តទុកដាក់ខ្ពស់ចំពោះរឿងនេះ ប្រទេសមួយចំនួនគាំទ្រប្រទេសទាំងបីនេះបំផុសការវាយប្រហារយោធាទៅលើប្រទេសស៊ីរី តែអង្គការសហប្រជាជាតិនិងប្រទេសភាគច្រើនគឺបានដាស់តឿនភាគីនានាមានពាក់ព័ន្ធរក្សាការអត់ធ្មត់ ដើម្បីស្វែងរកការដោះស្រាយបញ្ហាស៊ីរីតាមមធ្យោបាយនយោបាយ ។
កាលពីថ្ងៃដដែល ក្រសួងការបរទេសស៊ីរីបានចេញផ្សាយសេចក្តីថ្លែងការណ៍ថា រដ្ឋាភិបាលស៊ីរីថ្កោលទោសយ៉ាងខ្លាំងចំពោះអាមេរិកអង់គ្លេសនិងបារាំងដែលបានបំផុសការវាយប្រហារគ្រាប់មីស៊ីលទៅលើស៊ីរី ការវាយប្រហារនេះបានបង្ហាញម្តងទៀតឲ្យឃើញនូវការមើលងាយរបស់អាមេរិក អង់គ្លេសនិងបារាំងចំពោះច្បាប់អន្តរជាតិ ទង្វើនេះនឹងបង្កើនស្ថានការណ៍តានតឹងពិភពលោក គំរាមកំហែងសន្តិភាពនិងសន្តិសុខអន្តរជាតិ ។ រដ្ឋាភិបាលស៊ីរីនៅបានដាស់តឿនសហគមន៍អន្តរជាតិឲ្យថ្កោលទោសការវាយប្រហារលើស៊ីរីលើកនេះរបស់អាមេរិក អង់គ្លេសនិងបារាំង ។
យប់ថ្ងៃទី ១៣ ខែមេសា លោកគូធើរេស អគ្គលេសាធិការអង្គការសហប្រជាជាតិបានចេញផ្សាយសេចក្តីថ្លែងការណ៍ ដោយបានគូសបញ្ជាក់ថាយកចិត្តទុកដាក់យ៉ាងដិតដល់ចំពោះប្រតិបត្តិការយោធារួមរបស់អាមេរិក អង់គ្លេសនិងបារាំង ដាស់តឿនសមាជិកក្រុមប្រឹក្សាសន្តិសុខសាមគ្គីគ្នា បំពេញកាតព្វកិច្ចដែលគាំពារសន្តិភាពនិងសន្តិសុខអន្តរជាតិ ធ្វើតាមធម្មនុញ្ញអង្គការសហប្រជាជាតិនិងច្បាប់អណ្តរជាតិ ចៀសវាសទង្វើណាមួយដែលមានលទ្ធភាពបណ្តាលឲ្យស្ថានការណ៍ស៊ីរីឡើងថ្នាក់និងនាំមកនូវទុក្ខវេទនាកាន់តែច្រើនដល់ប្រជាជនស៊ីរីនោះទេ ។