លោក LiKeqiang នាយករដ្ឋមន្ត្រីចិនបានជួបពិភាក្សាការងារជាមួយគណៈប្រតិភូនៃ សមាគមជំរុញពាណិជ្ជកម្មអន្តរជាតិរបស់ជប៉ុនដែលដឹកនាំដោយលោក Kono Yohei ជាប្រធានសមាគមសមាគមកាលពីថ្ងៃទី ៩ ខែមេសានៅក្រុងប៉េកាំង ។
ក្នុងកិច្ចជំនួប លោក LiKeqiang បានថ្លែងថា ទំនាក់ទំនងរវាងចិននិងជប៉ុនពេលបច្ចុប្បន្ននេះបានរក្សានិន្នាការកែលម្អជាទូទៅ តែនៅតែមានបញ្ហាប្រឈមច្រើនដដែល ។ ដូច្នេះ ត្រូវតែមានចក្ខុវិស័យវែងឆ្ងាយនិងមានការប្តេជ្ញាចិត្ត ដើម្បីបង្កើតបរិយាកាសដែលមានអំណោយផលសម្រាប់ការដើរលើមាគ៌ាត្រឹមត្រូវឡើងវិញនៃទំនាក់ទំនងរវាងប្រទេសទាំងពីរ ។
លោក LiKeqiang បានគូសបញ្ជាក់ទៀតថា ឆ្នាំ២០១៨នេះជាខួប៤០ឆ្នាំនៃការចុះហត្ថលេខាលើសន្ធិសញ្ញាសន្តិភាពនិងមេត្រីភាពរវាងចិននិងជប៉ុន សង្ឃឹមថា ប្រទេសជប៉ុនអាចរួមសហការជាមួយចិនដើរទៅកាន់ទិសដៅដូចគ្នា គោរពតាមគោការណ៍នៃឯកសារនយោបាយទាំង៤រវាងចិននិងជប៉ុន ចាត់ទុកប្រវត្តិសាស្ត្រជាមេរៀន ដើរឆ្ពោះទៅកាន់អនាគត ក្នុងន័យបន្តជំរុញការកែលម្អទំនាក់ទំនងរវាងចិននិងជប៉ុននិងធានាដល់ការដើរទៅតាមទិសដៅត្រឹមត្រូវ ។
ជាការឆ្លើយតប លោក Kono Yohei បានថ្លែងថា មជ្ឈដ្ឋានសហគ្រាសឧស្សាហកម្មនិងពាណិជ្ជកម្មជប៉ុនមានការស្វាគមន៍ចំពោះការកែលម្អជាបន្តបន្ទាប់នូវទំនាក់ទំនងរវាងចិននិងជប៉ុន ព្រមទាំងរីករាយរួមចំណែកជាវិជ្ជមានដល់ការរឹតចំណងមិត្តភាពរវាងប្រទេសទាំងពីរផងដែរ ។
