ថ្ងៃទី១៤ខែវិចិ្ឆកាឆ្នាំ២០១៧ សន្និសីទប្រកាសការដាក់លក់សៀវភៅចំណងជើងថា ការណែនាំនូវការព្យាបាលជំងឺទឹកនោមផ្អែមដោយវិជ្ជាពេទ្យនិងថ្នាំចិនសែអន្តរជាតិបានបើកធ្វើនៅក្រុង Shen Zhen ប្រទេសចិន ។ សៀវភៅណែនាំនេះគឺជាការណែនាំនូវការព្យាបាលជំងឺតាមវិជ្ជាពេទ្យនិងថ្នាំចិនសែអន្តរជាតិដំបូងបង្អស់របស់សមាគមពេទ្យនិងថ្នាំចិនសែពិភពលោក ។ លោក Yang Rongchen អនុប្រធានផ្នែកគោលនយោបាយច្បាប់និងការត្រួតពិនិត្យនៃនាយកដ្ឋានគ្រប់គ្រងពេទ្យនិងថ្នាំចិនសែប្រទេសចិន ព្រមទាំងអ្នកដឹកនាំជាច្រើនរូបទៀតដូចជា លោក Sang Binsheng អគ្គលេខាធិការនៃគណៈកម្មាធិការសមាគមពេទ្យនិងថ្នាំចិនសែពិភពលោកនិងលោក Wu Yihuan អភិបាលរងក្រុង Shen Zhen និងក្រុមអ្នកជំនាញការជាតិនិងអន្តរជាតិដូចជា លោក Shen Yuandong អនុប្រធានគណៈកម្មាធិការបច្ចេកទេសពេទ្យនិងថ្នាំចិនសែនិងជាអង្គការស្តង់ដារអន្តរជាតិ លោក Shen Jiangang អនុប្រធានវិទ្យាស្ថានពេទ្យនិងថ្នាំចិនសែនៃសកលវិទ្យាល័យហុងកុង និងលោក Yang Guanhu អនុប្រធានសមាគមពេទ្យនិងថ្នាំចិនសែទូទាំងអាមេរិកជាដើមបានចូលរួមសន្និសីទលើកនេះ ។
លោក Yang Rongchen អនុប្រធានផ្នែកគោលនយោបាយច្បាប់និងការត្រួតពិនិត្យនៃនាយកដ្ឋានគ្រប់គ្រងពេទ្យនិងថ្នាំចិនសែប្រទេសចិនបានថ្លែងថា ការផ្លាស់ប្តូរព័ត៌មានជាលក្ខណៈអន្តរជាតិអំពីពេទ្យនិងថ្នាំចិនសែ សកម្មភាពព្យាបាលជំងឺ ការបណ្តុះបណ្តាលធនធានមនុស្ស ការស្រាវជ្រាវផ្នែកវិទ្យាសាស្ត្រនិងច្បាប់គ្រប់គ្រង សុទ្ធតែត្រូវការមានស្តង់ដារអន្តរជាតិជាចាំបាច់ ។ ក្នុងនាមជាប្រភពដើមនៃវិជ្ជាពេទ្យនិងថ្នាំចិនសែ ប្រទេសចិនមិនគ្រាន់តែជំរុញត្រូវឲ្យពេទ្យនិងថ្នាំចិនសែមានស្តង់ដារប៉ុណ្ណោះទេ ថែមទាំងត្រូវក្លាយទៅជាអ្នកកំណត់ស្តង់ដារអន្តរជាតិនៃពេទ្យនិងថ្នាំចិនសែផងដែរ នោះទើបអាចបន្តធ្វើជាអ្នកណែនាំនៃការអភិវឌ្ឍពេទ្យនិងថ្នាំចិនសែ ។
លោក Sang Binsheng អគ្គលេខាធិការនៃគណៈកម្មាធិការសមាគមពេទ្យនិងថ្នាំចិនសែពិភពលោកបានថ្លែងក្នុងសន្និសីទនេះថា គោលបំណងដើមដែលសមាគមពេទ្យនិងថ្នាំចិនសែពិភពលោកចងក្រងសៀវភៅណែនាំនេះឡើងគឺដើម្បីស្វែងរករូបមន្តថ្មីសម្រាប់ការណែនាំផ្នែកព្យាបាលជំងឺតាមវិជ្ជាពេទ្យនិងថ្នាំចិនសែអន្តរជាតិ ហើយសង្ឃឹមថា បន្ទាប់ពីការដាក់លក់សៀវភៅនេះ វានឹងអាចត្រូវយកទៅប្រើប្រាស់ជាទូទៅនៅលើផ្ទៃអន្តរជាតិ ។
លោកសាស្ត្រាចារ្យ Tong Xiaolin ដែលជាសមាជិកស្រាវជ្រាវទីមួយនៃបណ្ឌិត្យសភាវិជ្ជាពេទ្យចិនសែប្រទេសចិនដែលជាអ្នកណែនាំក្នុងការចងក្រងសៀវភៅនេះបានថ្លែងថា ជំងឺទឹកនោមផ្អែមបានក្លាយទៅជាជំងឺដ៏ធ្ងន់ធ្ងរដែលទូទាំងពិភពលោកយកចិត្តទុកដាក់ដោយសារជំងឺនេះមានអត្រាប្រឈមខ្ពស់និងអត្រាបណ្តាលឲ្យមនុស្សពិការនិងស្លាប់ខ្ពស់នៅទូទាំងពិភពលោក សង្ឃឹមថា សៀវភៅណែនាំនេះអាចរួមចំណែកដល់ការពិនិត្យព្យាបាលជំងឺជាក់ស្តែងរបស់គ្រូពេទ្យចិនសែទាំងក្នុងនិងក្រៅប្រទេស ការតាក់តែងច្បាប់ផ្នែកពេទ្យនិងថ្នាំចិនសែអន្តរជាតិ ព្រមទាំងការគ្រោងផែនការអភិវឌ្ឍន៍ពេទ្យនិងថ្នាំចិនសែនៃគំនិតផ្តួចផ្តើមខ្សែក្រវាត់មួយនិងផ្លូវមួយ ។
