រសៀលថ្ងៃទី ១៣ ខែវិចិ្ឆកា តាមម៉ោងប្រទេសហ្វីលីពីន លោក លីខឺឈាង នាយករដ្ឋមន្ត្រីចិនបានជួបពិភាក្សាការងារជាមួយសម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅក្រុងម៉ានីលប្រទេសហ្វីលីពីន ។
ក្នុងកិច្ចជំនួប លោក លីខឺឈាងបានថ្លែងថា ប្រទេសចិននិងកម្ពុជាជាមិត្តភក្តិស្មោះត្រង់ ។ ប្រទេសចិននឹងគាំទ្រជានិច្ចដល់ប្រទេសកម្ពុជាក្នុងការបន្តដើរតាមមាគ៌ាអភិវឌ្ឍន៍ដែលសមស្របនឹងសភាពការណ៍នៃប្រទេសខ្លួនជាបន្តទៀត គាំទ្រការខិតខំប្រឹងប្រែងគ្រប់បែបយ៉ាងរបស់ប្រទេសកម្ពុជាក្នុងការគាំពារអធិបតេយ្យភាព និងឯករាជ្យភាពរបស់ប្រទេសជាតិ និងរក្សាសិ្ថរភាពក្នុងប្រទេសក៏ដូចជាពន្លឿនការអភិវឌ្ឍសេដ្ឋកិច្ចផងដែរ ។ ប្រទេសចិនរីករាយរក្សាការប្រាស្រ័យទាក់ទងជាន់ខ្ពស់ជាមួយប្រទេសកម្ពុជា បង្កើនកិច្ចសហប្រតិបតិ្តការជាក់ស្តែងលើគ្រប់វិស័យ និងជំរុញការផ្លាស់ប្តូរខាងផ្នែកវប្បធម៌មនុស្សជាតិ ជាពិសេសនឹងរួមគ្នារៀបចំសកម្មភាពអបអរសាទរខួបទី ៦០ នៃការបង្កើតទំនាក់ទំនងការទូតនៃប្រទេសយើងទាំងពីរឲ្យបានល្អនៅឆ្នាំក្រោយ ក៏ដូចជាជួយសហការគ្នាជាមួយភាគីកម្ពុជាក្នុងការរៀបចំសន្និសីទលើកទីពីរស្តីពីថ្នាក់ដឹកនាំនៃកិច្ចសហប្រតិបតិ្តការទន្លេឡានឆាង-មេគង្គដែលនឹងបើកធ្វើនៅប្រទេសកម្ពុជានៅឆ្នាំ ក្រោយ ដើម្បីជំរុញទំនាក់ទំនងរវាងចិននិងកម្ពុជាឲ្យមានភាពកាន់តែល្អប្រសើរថែមទៀត ក្នុងន័យរួមវិភាគទានសម្រាប់សិ្ថរភាពនិងវឌ្ឈនភាពក្នុងតំបន់ ។
ជាការឆ្លើយតប សម្តេច ហ៊ុន សែន បានថ្លែងថា ទំនាក់ទំនងមេត្រីភាពរវាងកម្ពុជានិងចិនមានប្រវតិ្តសាស្ត្រជាយូរលង់ណាស់មកហើយ ឆ្នាំក្រោយគឺជាខួបទី ៦០ នៃការបង្កើតទំនាក់ទំនងការទូតរវាងកម្ពុជានិងចិន ហើយប្រទេសកម្ពុជាក៏នឹងធ្វើជាម្ចាស់ផ្ទះរៀបចំសន្និសីទលើកទីពីរថ្នាក់ដឹកនាំនៃកិច្ចសហប្រតិបតិ្តការទន្លេឡានឆាង-មេគង្គផងដែរ ដូច្នេះ ទំនាក់ទំនងទ្វេភាគីនឹងឈានចូលដល់សករាជថី្ម ។ ប្រទេសកម្ពុជារីករាយបង្កើនការផ្លាស់ប្តូរនិងកិច្ចសហប្រតិបតិ្តការលើវិស័យអភិបាលកិច្ចជាតិ និងកិច្ចកសាងហេដ្ឋារចនាសម័្ពន្ធជាដើម ដើម្បីជំរុញទំនាក់ទំនងភាពជាដៃគូសហប្រតិបតិ្តការយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរឲ្យទទួលបានការអភិវឌ្ឍរីកចម្រើនទៀត ៕
