ថៃ្ងទី១០ ខែវិច្ឆិកា លោកស៊ីជីនភីង ប្រធានរដ្ឋចិនបានអញ្ជើញចូលរួមកិច្ចសន្ទនារវាងថ្នាក់ដឹកនាំអង្គការកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកនិងសមាគមអាស៊ាននៅក្រុងដាណាងប្រទេសវៀតណាម។
អង្គប្រជុំនៃអ្នកដឹកនាំនេះបានធ្វើការពិគ្រោះពិភាក្សាជុំវិញកិច្ចសហប្រតិបត្តិការស្វែងរកកម្លាំងចលករថ្មី កសាងការតភ្ជាប់គ្នានិងការទាក់ទងគ្នាទៅវិញទៅមកនិងសមាហរណកម្មអាស៊ីប៉ាស៊ីហ្វិក ព្រមទាំងកិច្ចសហប្រតិបត្តិការរវាងអង្គការកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកនិងសមាគមអាស៊ាន។
លោក ស៊ីជីនភីងបានបង្ហាញក្នុងសុន្ទរកថាថា អង្គការសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកជាវេទិកាកិច្ចសហប្រតិបត្តិការផ្នែកសេដ្ឋកិច្ចដ៏មានឥទ្ធិពលធំបំផុតនៅតំបន់អាស៊ីប៉ាស៊ីហ្វិក អាស៊ានជាអង្គការសមាហរណកម្មក្នុងតំបន់ដែលមានកម្លាំងរស់រវើកនិងសក្តានុពលធំបំផុតនៅអាស៊ី ដូច្នេះ អនាគតនៃការធ្វើកិច្ចសហប្រតិបត្តិការគ្នារវាងភាគីទាំងពីរគឺទូលំទូលាយ ។
លោកស៊ីជីនភីងបានលើកឡើងនូវសំណើមួយចំនួនអំពីការធ្វើកិច្ចសហប្រតិបត្តិការរវាងអង្គការ APEC និងអាស៊ាន។
ទី ១ រួមគ្នាជំរុញការធ្វើសមាហរណកម្មសេដ្ឋកិច្ចតំបន់ ។
ទី ២ រួមគ្នាជំរុញការកសាងការតភ្ជាប់គ្នា ។
ទី ៣ រួមគ្នាជំរុញបរិយាប័ន្ននិងការអភិវឌ្ឍជានិរន្តរភាព ។
លោកស៊ីជីនភីង បានសង្កត់ធ្ងន់ថា ប្រទេសចិនអភិវឌ្ឍយ៉ាងម៉ឺងម៉ាត់នូវកិច្ចសហប្រតិបត្តិការមេត្រីភាពជាមួយអាស៊ាន គាំទ្រយ៉ាងម៉ឺងម៉ាត់ដល់កិច្ចកសាងសហគមន៍អាស៊ាន គាំទ្រយ៉ាងម៉ឺងម៉ាត់នូវឋានៈកណ្តាលរបស់អាស៊ានក្នុងកិច្ចសហប្រតិបត្តិការតំបន់ ប្រទេសចិននឹងជំរុញឲ្យគំនិតផ្តួចផ្តើម " ខ្សែក្រវាត់មួយនិងផ្លូវមួយ " តភ្ជាប់កាន់តែស៊ីជម្រៅជាមួយយុទ្ធសាស្ត្រអភិវឌ្ឍន៍អាស៊ាន បង្កើតទំនាក់ទំនងដៃគូយុទ្ធសាស្ត្រចិន-អាស៊ានដែលមានកម្រិតកាន់តែខ្ពស់ ឈានទៅកាន់សមាគមរួមវាសនាចិន-អាស៊ានដ៏កាន់តែជិតស្និទ ដើម្បីបញ្ចូលកម្លាំងថ្មីក្នុងការសម្រេចនូវការអភិវឌ្ឍរួមគ្នានិងទទួលបានភាពរុងរឿងរួមគ្នានៃតំបន់អាស៊ីប៉ាស៊ីហ្វិក៕
