មុនពេលអញ្ជើញទៅចូលរួមសន្និសីទក្រៅផ្លូវការរបស់អ្នកដឹកនាំលើកទី២៥នៃអង្គការកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វីក និងអញ្ជើញទៅបំពេញទស្សនកិច្ចផ្លូវរដ្ឋនៅប្រទេសវៀតណាម លោកស៊ីជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិននិងជាប្រធានរដ្ឋចិនបានចុះផ្សាយអត្ថបទដែលមានចុះឈ្មោះលើកាសែត Nhan Dan របស់វៀតណាម ។ អត្ថបទនេះបាននាំឲ្យមានការពិភាក្សាយ៉ាងកក់ក្តៅនៅមជ្ឈដ្ឋាននានារបស់ប្រទេសវៀតណាម ។
លោក Tran Viet Thai អនុប្រធានមន្ទីរយុទ្ធសាស្ត្រនៃវិទ្យាស្ថានការទូតវៀតណាមបានបង្ហាញការយល់ព្រមចំពោះខ្លឹមសារនៃអត្ថបទនេះ ។ លោកថ្លែងថា លោកយល់ស្របទាំងស្រុងចំពោះការអធិប្បាយស្តីពីប្រវត្តិសាស្ត្រនិងសភាពការណ៍បច្ចុប្បន្នរបស់វៀតណាមនិងចិនដែលចែងក្នុងអត្ថបទ ក្នុងរយៈពេលមួយឆ្នាំកន្លងទៅនេះ ការវិវាទរបស់ភាគីទាំងពីរត្រូវបានគ្រប់គ្រងប្រកបដោយប្រសិទ្ធភាព ទំនុកចិត្តផ្នែកនយោបាយត្រូវបង្កើនឡើងឥតឈប់ឈរ ជំរុញបង្កើតបានវេទិកាកិច្ចសហប្រតិបត្តិការដ៏ល្អប្រសើរមួយក្នុងវិស័យសេដ្ឋកិច្ចពាណិជ្ជកម្ម វប្បធម៌និងការប្រាស្រ័យទាក់ទងទៅវិញទៅមកជាដើម ។ លោកសង្ឃឹមថា ទស្សនកិច្ចរបស់លោកស៊ីជីនភីងលើកនេះអាចទទួលជោគជ័យយ៉ាងគាប់ប្រសើរ ក្លាយទៅជានិមិត្តសញ្ញាមួយនៃទំនាក់ទំនងវៀតណាមនិងចិន ហើយបង្កើតកម្លាំងជំរុញសម្រាប់ការអភិវឌ្ឍជាក់ស្តែងផងដែរ ។
