រដ្ឋមន្ត្រីក្រសួងការបរទេសអាមេរិកសម្តែងសេចកី្តត្រេកអរចំពោះការរក្សាភាពអត់ធ្មត់របស់កូរ៉េខាងជើង ប្រទេសចិនសង្ឃឹមភាគីនានាបង្ហាញសុទ្ធចិត្តទៅវិញទៅមក

ថ្ងៃទី ២២ ខែសីហា លោក Tillerson រដ្ឋមន្ត្រីក្រសួងការបរទេសអាមេរិកបានថ្លែងថា លោកមានការត្រេកអរណាស់ដែលបានឃើញកូរ៉េខាងជើងបង្ហាញពីភាពអត់ធ្មត់គ្រាន់បើតាំងពីក្រុមប្រឹក្សាសនិ្តសុខអង្គការសហប្រជាជាតិបានប្រកាសដាក់ទណ្ឌកម្មថី្មចំពោះកូរ៉េខាងជើងមក លោកបានថ្លែងទៀតថា នេះប្រហែលជាផ្លូវមួយសម្រាប់ការបើកធ្វើកិច្ចសន្ទនារវាងអាមេរិកនិងកូរ៉េខាងជើង ។ ទាក់ទិននឹងរឿងនេះ លោកស្រី Hua Chunying អ្នកនាំពាក្យក្រសួងការបរទេសចិនបានថ្លែងនៅថ្ងៃទី ២៣ ខែសីហាថា ប្រទេសចិនបានចាប់អារម្មណ៍ដល់ការបង្ហាញអាកប្បកិរិយាពាក់ព័ន្ធរបស់លោក Tillerson រដ្ឋមន្ត្រីក្រសួងការបរទេសអាមេរិកហើយ ជាពិសេសបានផ្តោតសំខាន់ទៅលើពាក្យសំដីរបស់លោកដែលបានគូសបញ្ជាក់ពីលទ្ធភាពនៃការបើកធ្វើកិច្ចសន្ទនារវាងអាមេរិកនិងកូរ៉េខាងជើង ។

លោកស្រី Hua Chunying បានថ្លែងទៀតថា ឆ្លងតាមរយៈការខិតខំប្រឹងប្រែងរបស់ភាគីនានា ស្ថានការណ៍តាងតឹងនៃឧបទ្វីបកូរ៉េបានលេចចេញតម្រុយមានភាពធូរស្រាលខ្លះហើយ ប៉ុន្តែនៅតែមានភាពស្មុគស្មាញនិងរសើបខ្លាំងដដែល បណ្តាភាគី ជាពិសេសគឺសាមីប្រទេសពាក់ព័ន្ធដូចជាកូរ៉េខាងជើងនិងអាមេរិកត្រូវរក្សាភាពអត់ធ្មត់ និងធ្វើកិច្ចខិតខំប្រឹងប្រែងដ៍ពិតប្រាកដឲ្យបានកាន់តែច្រើនផងដែរ ៕