ថ្ងៃទី ៩ ខែមិថុនា សន្និសីទលើកទី ១៧ នៃក្រុមប្រឹក្សាភិបាលប្រមុខរដ្ឋនៃប្រទេសជាសមាជិកអង្គការសហប្រតិបត្តិការក្រុងសៀងហៃបានរៀបចំធ្វើនៅក្រុងអាស្តាណា រដ្ឋធានីកាហ្សាក់ស្ថាន ។ លោកស៊ីជីនភីង ប្រធានរដ្ឋចិន លោកប្រធានាធិបតីកាហ្សាក់ស្ថាន លោកប្រធានាធិបតីឃើគីស្ថាន លោកប្រធានាធិបតីរុស្ស៊ី លោកប្រធានាធិបតីតាជីគីស្ថាន និងលោកប្រធានាធិបតីអ៊ូបេគីស្ថានបានអញ្ជើញចូលរួមសន្និសីទនេះ ។ លោកស៊ីជីនភីងបានថ្លែងសុន្ទរកថាសំខាន់ក្នុងសន្និសីទ ដោយគូសបញ្ជាក់ថា ប្រទេសជាសមាជិកអង្គការសហប្រតិបត្តិការក្រុងសៀងហៃគួរតែបង្កើនមនសិការៈអំពីសហគមន៍រួមវាសនាតែមួយ ពង្រឹងសាមគ្គីភាព ចាប់ដៃគ្នាតទល់នឹងបញ្ហាប្រឈម ធ្វើឲ្យកិច្ចសហប្រតិបត្តិការជាក់ស្តែងមានភាពកាន់តែស៊ីជម្រៅ និងរួមគ្នាបង្កបង្កើតអនាគតកាន់តែភ្លឺស្វាងនៃអង្គការមួយនេះ ៕