ពេលកន្លងទៅនេះ ដោយសារគូរបដិបក្ខរវាងអាមេរិកនិងកូរ៉េខាងជើង ស្ថានការណ៍តានតឹងនៅឧបទ្វីបកូរ៉េកើនឡើងឥតឈប់ឈរ ប្រឈមមុខនឹងហានិភ័យដែលអាចកើតសង្គ្រាម ។ ក្នុងគ្រាដ៏គ្រោះថ្នាក់នេះ ប្រទេសចិនបានចេញមុខបន្ធូរស្ថានការណ៍នេះម្តងទៀត ។
ព្រឹកថ្ងៃទី ២៤ខែមេសា លោកស៊ីជីនភីង ប្រធានរដ្ឋចិនបានទាក់ទងជាមួយលោកត្រាំ ប្រធានាធិបតីអាមេរិកតាមទូរសព្ទអំពីស្ថានការណ៍ឧបទ្វីបកូរ៉េជាដើម នេះគឺជាការនិយាយទូរសព្ទលើកទី ២ រវាងអ្នកដឹកនាំទាំងពីរក្រោយពីជំនួបនៅភូមិគ្រឹះMar-a-Lago ។ លោកស៊ីជីនភីងបានគូសបញ្ជាក់ថា ភាគីចិនប្រឆាំងយ៉ាងដាច់ខាតចំពោះអំពើដែលល្មើសនឹងសេចក្តីសម្រេចនៃក្រុមប្រឹក្សាសន្តិសុខអង្គការសហប្រជាជាតិ ព្រមជាមួយនេះ ក៏សង្ឃឹមភាគីពាក់ព័ន្ធរក្សាការអត់ធ្មត់ ចៀសវាងកុំធ្វើរឿងដែលបង្កើនភាពតានតឹងនៅឧបទ្វីបកូរ៉េ ។
ស្តីពីបញ្ហានុយគ្លែអ៊ែររបស់កូរ៉េខាងជើង ប្រទេសចិនមានគោលជំហរច្បាស់លាស់និងជាប់រហូតមក គឺប្រកាន់ខ្ជាប់ភាពគ្មាននុយគ្លែអ៊ែរនៅឧបទ្វីប ព្រមទាំងគាំពារសន្តិភាពនិងស្ថិរភាពនៃឧបទ្វីប ម្យ៉ាងវិញទៀត ចិនមានគោលគំនិតដោះស្រាយបញ្ហានុយគ្លែអ៊ែរនៅឧបទ្វីបតាមរយៈមធ្យោបាយសន្តិវិធី។
បច្ចុប្បន្ននេះ ស្ថានការណ៍ឧបទ្វីបកូរ៉េមានភាពស្មុគស្មាញនិងរសើបកម្រិតខ្ពស់ ក្នុងរយៈពេលជាគន្លឹះនេះ ត្រូវការការគិតពិចារណា មិនមែនធ្វើអ្វីតាមទំនើងចិត្តនោះទេ ហើយត្រូវការសន្តិភាពមិនមែនកម្លាំងអាវុធទេ។ភាគីនានាត្រូវតែប្រកាន់ខ្ជាប់ទស្សនៈសន្តិភាព សមហេតុផល និងភាពទទួលខុសត្រូវដើរទៅជាមួយគ្នា នោះ ទើបអាចរកឃើញមធ្យោបាយមានប្រសិទ្ធិភាពដើម្បីពុះពារភាពលំបាកនៃឧបទ្វីបកូរ៉េ។
