ថ្ងៃទី២០ខែមីនា លោកវ៉ាងអ៊ីរដ្ឋមន្រ្តីការបរទេសចិនបានអញ្ជើញចូលរួមកិច្ចប្រជុំប្រចាំឆ្នាំនៃវេទិកាជាន់ខ្បស់ស្តីពីការអភិវឌ្ឍរបស់ប្រទេសចិន និងបានថ្លែងសុន្ទរកថាក្រោមចំណងជើងថា រួមគ្នាកសាងទំនាក់ទំនងភាពជាដៃគូ រួមគ្នាស្វែងរកសន្តិភាពនិងវឌ្ឍនភាព។ លោកវ៉ាងអ៊ីថ្លែងថា បច្ចុប្បន្ន ពិភពលោកនៅមិនទាន់ដើរចេញពីភាពគ្មានសណ្តាប់ធ្នាប់នៅឡើយទេ ដូច្នេះសហគមន៍អន្តរជាតិរំពឹងថាប្រទេសចិនអាចដើរតួនាទីកាន់តែច្រើនសម្រាប់ជំរុញស្ថិរភាពនិងវឌ្ឍនភាពនៃពិភពលោក។ ប្រទេសចិនរីករាយនិងសកម្មក្នុងការរ៉ាប់រងករណីយកិច្ចអន្តរជាតិរបស់ខ្លួន តែមិនដែលនឹកគិតថានឹងធ្វើការដឹកនាំពិភពលោកទេ។ ក្នុងយុគសម័យនៃសកលភាវូបនីយកម្ម អ្វីដែលពិភពលោកត្រូវការនោះមិនមែនវរជនដែលធ្វើការដោយខ្លួនឯងទេ តែគឺដៃគូសហការដែលផ្តល់ការជួយជ្រោមជ្រែងដល់គ្នា។ប្រទេសចិនរីករាយបង្កើតទំនាក់ទំនងភាពជាដៃគូដែលប្រកបដោយសមភាព បើកចំហនិងសហការជាមួយប្រទេសនានាតាមស្មារតីធ្វើការសន្ទនាគ្នាតែមិនបដិបក្ខគ្នា ធ្វើជាដៃគូតែមិនចងសម្ព័ន្ធ សំដៅពន្លឿនការកសាងទំនាក់ទំនងអន្តរជាតិបែបថ្មីដែលចាត់ទុកកិច្ចសហប្រតិបត្តិការនិងឈ្នះ-ឈ្នះជាស្នូល ព្រមនិងធ្វើកិច្ចខិតខំប្រឹងប្រែងឥតឈប់ឈរសំដៅឆ្ពោះទៅកាន់គោលដៅយូរអង្វែងស្តីពីការបង្កើតសហគមន៍រួមវាសនាតែមួយរបស់មនុស្សលោក៕
 |  |  |  |  |  |
