ថ្ងៃទី ២២ ខែកុម្ភៈ លោកស៊ី ជីនភីង ប្រធានរដ្ឋចិនបានជួបពិភាក្សាការងារជាមួយលោកSergio Mattarella ប្រធានាធិបតីអ៊ីតាលី ។
ក្នុងកិច្ចជំនួប លោកស៊ី ជីនភីងបានថ្លែងថា ប្រទេសចិនសូមស្វាគមន៍ចំពោះប្រទេសអ៊ីតាលីក្នុងការសកម្មចូលរួមការកសាងយុទ្ធសាស្រ្តស្តីពី"ខ្សែក្រវាត់មួយនិងផ្លូវមួយ" សំដៅបង្កើតជាវេទិកាកាន់តែទូលំទូលាយសម្រាប់ធ្វើឲ្យកិច្ចសហប្រតិបត្តិការរវាងទ្វេភាគីមានភាពកាន់តែស៊ីជម្រៅ ។ ប្រទេសទាំងពីរគប្បីធ្វើឲ្យកិច្ចសហប្រតិបត្តិការផ្នែកច្នៃប្រឌិតថ្មីមានភាពកាន់តែស៊ីជម្រៅ ពង្រឹងនិងពង្រីកការផ្លាស់ប្តូរនិងកិច្ចសហប្រតិបត្តិការលើវិស័យសម្បត្តិបេតិកភ័ណ្ឌវប្បធម៌ ជំរុញការកសាងមជ្ឈមណ្ឌលវប្បធម៌ ក៏ដូចជាបង្កើនការប្រាស្រ័យទាក់ទងក្នុងសង្គមស៊ីវិល ។ លោកសង្កត់ធ្ងន់ទៀតថា ប្រទេសចិនគាំទ្រអឺរ៉ុបដើរតាមមាគ៌ាធ្វើសមាហរណកម្ម ។
ជាការឆ្លើយតប លោកMattarella បានថ្លែងថា ប្រទេសអ៊ីតាលីរីករាយធ្វើឲ្យកិច្ចសហប្រតិបត្តិការយ៉ាងស្អិតល្មួតជាមួយប្រទេសចិនលើគ្រប់វិស័យ ដូចជាការប្រាស្រ័យទាក់ទងជាន់ខ្ពស់ ក៏ដូចជាផ្នែកសេដ្ឋកិច្ច ពាណិជ្ជកម្ម និងវប្បធម៌ជាដើម ដើម្បីជំរុញការផ្លាស់ប្តូរខាងវប្បធម៌មនុស្សជាតិក្រោមក្របខ័ណ្ឌយុទ្ធសាស្រ្ត"ខ្សែក្រវាត់មួយនិងផ្លូវមួយ" ។ ប្រទេសអ៊ីតាលីគាំទ្រចំពោះការគាំពារប្រព័ន្ធពាណិជ្ជកម្មពហុភាគីដែលបើកចំហ ហើយរីករាយបង្កើនការប្រាស្រ័យទាក់ទងជាមួយប្រទេសចិនទាំងក្នុងកិច្ចការតំបន់និងអន្តរជាតិ ។ ប្រទេសអ៊ីតាលីនឹងខិតខំជំរុញទំនាក់ទំនងរវាងអឺរ៉ុបនិងចិនឲ្យវិវឌ្ឍកាន់តែស៊ីជម្រៅទៀត ៕