ថ្ងៃទី១៣ខែតុលា លោកស៊ី ជីនភីងប្រធានរដ្ឋចិនបានជួបពិភាក្សាការងារជាមួយសម្តេចហ៊ុនសែននាយករដ្ឋមន្រ្តីកម្ពុជានៅក្រុងភ្នំពេញ។ ភាគីទាំងពីរបានវាយតម្លៃខ្ពស់ចំពោះចំណងមិត្តភាពប្រពៃណីរវាងចិននិងកម្ពុជា និងបានផ្លាស់ប្តូរមតិយោបល់អំពីការធ្វើឲ្យស៊ីជម្រៅនូវទំនាក់ទំនងភាពជាដៃគូសហប្រតិបត្តិការយុទ្ធសាស្រ្តគ្រប់ជ្រុងជ្រោយរវាងចិននិងកម្ពុជាព្រមនិងបញ្ហាអន្តរជាតិនិងតំបន់ដែលយកចិត្តទុកដាក់ដូចគ្នា ហើយបានឈានដល់មតិឯកភាពរួមយ៉ាងទូលំទូលាយ ដោយសម្រេចជាឯកច្ឆ័ន្ទថានឹងរួមគ្នាពង្រឹងនិងពង្រីកចំណងមិត្តភាពរវាងចិននិងកម្ពុជា សំដៅជំរុញទំនាក់ទំនងភាពជាដៃគូសហប្រតិបត្តិការជាយុទ្ធសាស្រ្តគ្រប់ជ្រុងជ្រោយរវាងចិននិងកម្ពុជាឲ្យឈានដល់កម្រិតថ្មីថែមទៀត។
លោកស៊ី ជីនភីងប្រធានរដ្ឋចិនបានកោតសរសើរថាប្រទេសកម្ពុជាមានស្ថិរភាពផ្នែកនយោបាយនិងសង្គម ការអភិវឌ្ឍសេដ្ឋកិច្ចមានល្បឿនលឿន ជីវភាពរស់នៅរបស់ប្រជាជនត្រូវបានកែលម្អព្រមនិងឋានៈអន្តរជាតិត្រូវបានលើកកម្ពស់ លោកជឿជាក់ថារាជរដ្ឋាភិបាលកម្ពុជាមុខជាអាចដឹកនាំប្រជាជនកម្ពុជាក្នុងការកសាងប្រទេសជាតិឲ្យបានកាន់តែសម្បូរណ៍សប្បាយនិងខ្លាំងក្លាជាមិនខាន។
ជាការឆ្លើយតប សម្តេចហ៊ុនសែនបានថ្លែងថា ប្រទេសកម្ពុជានិងចិនជាមិត្តភក្តិល្អដែលមានទំនុកចិត្តលើគ្នាកម្រិតខ្ពស់ ភាគីទាំង២មានការយល់ដឹងពីគ្នានិងផ្តល់ការគាំទ្រគ្នាលើបញ្ហាអភិវឌ្ឍន័របស់ខ្លួននិងបញ្ហាដែលសមភាគីបានផ្តោតការយកចិត្តទុកដាក់ជាសំខាន់។ ភាគីកម្ពុជាសូមថ្លែងអំណរគុណចំពោះភាគីចិនដែលបានផ្តល់ជំនួយឧបត្ថម្ភក្នុងរយៈពេលជាយូរកន្លងមក ព្រមនិងប្រកាន់ខ្ជាប់នូវការចាត់ទទួលបន្តនិងអភិវឌ្ឍចំណងមិត្តភាពជាប្រពៃណីរវាងកម្ពុជានិងចិនដែលរួមគ្នាបង្កើតឡើងបង្កតដោយថ្នាក់ដឹកនាំជំនាន់មុនរបស់ប្រទេសទាំង២។ ភាគីកម្ពុជារីករាយក្នុងការរួមសហការជាមួយភាគីចិន ចាត់ទុកដំណើរទស្សនកិច្ចរបស់លោកប្រធានរដ្ឋស៊ី ជីនភីង លើកនេះជាកាលានុវត្តភាពមួយ សម្រាប់ពង្រឹងនិងពង្រីកមិត្តភាពរវាងកម្ពុជានិងចិន ព្រមនិងធ្វើឲ្យស៊ីជម្រៅនូវទំនាក់ទំនងភាពជាដៃគូសហប្រតិបត្តិការជាយុទ្ធសាស្រ្តគ្រប់ជ្រុងជ្រោយរវាងប្រទេសទាំង២។
ថ្នាក់ដឹកនាំនៃប្រទេសទាំង២បានសម្រេចជាឯកច្ឆ័ន្ទថានឹងពង្រឹងមេត្រីភាពជាប្រពៃណីរវាងចិននិងកម្ពុជា ជំរុញដោយពេញទំហឹងនូវកិច្ចសហប្រតិបត្តិការជាយុទ្ធសាស្រ្តគ្រប់ជ្រុងជ្រោយ ដើម្បីធ្វើឲ្យប្រទេសទាំង២បន្តធ្វើជាមិត្តល្អដែលមានទំនុកចិត្តលើគ្នាកម្រិតខ្ពស់ និងជាដៃគូដ៏ស្មោះត្រង់ក៏ដូចជាសហគមន៍រួមវាសនាតែមួយតទៅទៀត។
បន្ទាប់ពីកិច្ចជំនួប ភាគីទាំង២បានចេញសេចក្តីថ្លែងការណ៍រួមរវាងសាធារណរដ្ឋប្រជាមានិតចិននិងព្រះរាជាណាចក្រកម្ពុជា៕
