ថ្ងៃទី៣០ខែកញ្ញា លោក Jean-Yves Le Drian រដ្ឋមន្ត្រីក្រសួងការពារជាតិបារាំងបានថ្លែងនៅពេលផ្តល់បទសម្ភាសន៍ជាមួយអ្នកសារព័ត៌មានថា សម្ព័ន្ធអន្តរជាតិសម្រាប់ការវាយប្រហារអង្គការរដ្ឋអ៊ីស្លាមដែលជាអង្គការជ្រុលនិយមដែលដឹកនាំដោយសហរដ្ឋអាមេរិកនឹងមានប្រតិបត្តិការដ៏ធំមួយនៅប្រទេសអ៊ីរ៉ាក់នៅពេលខាងមុខនេះ ដើម្បីវាយដណ្តើមក្រុង Mosol ដែលជាទីក្រុងដ៏សំខាន់ដែលត្រូវកងកម្លាំងប្រដាប់អាវុធនៃអង្គការរដ្ឋអ៊ីស្លាមទន្ទ្រានកាន់កាប់នោះយកមកវិញ ។
នៅព្រឹកថ្ងៃដដែល មានប្រព័ន្ធសារព័ត៌មានបារាំងជាច្រើនបានផ្សាយដំណឹងថា ការប្រយុទ្ធដណ្តើមយកក្រុង Mosol មកវិញនឹងចាប់ផ្តើមពីខែតុលានេះតទៅ ។ ព្រឹកថ្ងៃទី៣០ខែកញ្ញា យន្តហោះចម្បាំង Rafale ចំនួន៨គ្រឿងរបស់កងទ័ពបារាំងបានហោះចេញពីនាវាផ្ទុកយន្តហោះសញ្ញា Charles de Gaulle ដែលសំចតនៅភាគខាងកើតសមុទ្រ Mediterranean ដើម្បីទៅអនុវត្តភារកិច្ចវាយប្រហាររបស់ខ្លួន ។ លោក Jean-Yves Le Drian គូសបញ្ជាក់ថា យន្តហោះចម្បាំងទាំងនេះគឺគ្រាន់តែទៅធ្វើកិច្ចសហប្រតិបត្តិការជាមួយប្រទេសអ៊ីរ៉ាក់ដើម្បីអនុវត្តភារកិច្ចប្រយុទ្ធសម្រាប់ប្រឆាំងភេរវកម្មនិយម តែមិនមែនជាការចាប់ផ្តើមនៃការប្រយុទ្ធដើម្បីដណ្តើមយកក្រុង Mosol មកវិញនោះទេ ។
