យប់ថ្ងៃទី៣០ខែកញ្ញា ក្រុមប្រឹក្សាកិច្ចការរដ្ឋចិនបានរៀបចំពិធីបដិសណ្ឋារកិច្ចអបអរថ្ងៃបុណ្យជាតិនៅវិមានសភាប្រជាជនចិន ដើម្បីអបអរសារទរយ៉ាងឱឡារិកនូវខួបទី៦៧ឆ្នាំនៃការបង្កើតសាធារណរដ្ឋប្រជាមានិតចិន។ អ្នកដឹកនាំបក្សនិងរដ្ឋចិនមានដូចជា លោក Xi Jinping លោក Li Keqiang លោកZhangDejiang លោកYuZhengsheng លោកLiuYunshan លោកWangQishan និងលោកZhangGaoliជាដើមព្រមនិងឥស្សរជនទាំងក្នុងនិងក្រៅប្រទេសចំនួន១២០០នាក់បានជួបជុំគ្នា ដើម្បីអបអរសារទរថ្ងៃបុណ្យជាតិនៃសាធារណរដ្ឋប្រជាមានិតចិន។
លោកLi Keqiangនាយករដ្ឋមន្រ្តីនៃក្រុមប្រឹក្សាកិច្ចការរដ្ឋចិនបានថ្លែងសុន្ទរកថាគន្លឹះ លោកថ្លែងថា ឆ្នាំនេះជាឆ្នាំចាប់ផ្តើមនៃផែនការអភិវឌ្ឍន៍ជាតិ៥ឆ្នាំទី១៣ ប្រឈម នឹងហានិភ័យនិងការសាកល្បងនានា ក្រោមការដឹកនាំដ៏មុតមាំរបស់គណៈកម្មាធិការមជ្ឈិមបក្សកុម្មុយនិស្តចិនដែលមានលោក Xi Jinping ជាអគ្គលេខាធិការ បក្សទាំងមូលបានរួមចិត្តរួមថ្លើមគ្នា សហការគ្នាពុះពារការលំបាកនិងឧបសគ្គ ទន្ទឹមនឹងពេលរក្សាបានកំណើនសមរម្យនៃតម្រូវការសរុបក៏បានខិតខំប្រឹងប្រែងជំរុញកំណែទម្រង់មានលក្ខណៈរចនាសម្ព័ន្ធសម្រាប់ការផ្គត់ផ្គង់ ការអភិវឌ្ឍសេដ្ឋកិច្ចសង្គម បានទទួលសមិទ្ធផលថ្មីដែលបានដោយមិនងាយ។
លោកLi Keqiang បានថ្លែងទៀតកថា ប្រទេសចិននឹងបន្តប្រកាន់ខ្ជាប់នូវគោលនយោបាយប្រទេសមួយគ្រប់គ្រងដោយប្រព័ន្ធពីរ ពលរដ្ឋហុងកុងគ្រប់គ្រងក្រុងហុងកុង ពលរដ្ឋម៉ាកាវគ្រប់គ្រងក្រុងម៉ាកាវ និងការគ្រប់គ្រងដោយស្វយ័តដែលមានកម្រិតខ្ពស់ គាំទ្រក្រុងហុងកុងនិងម៉ាកាវដើរតួនាទីពិសេសក្នុងដំណើរធ្វើទំនើបកម្មជាតិ ដើម្បីសម្រេចការអភិវឌ្ឍថ្មី ។ បន្តប្រកាន់ខ្ជាប់គោលការណ៍ប្រទេសចិនតែមួយ និងមតិឯកភាពរួមឆ្នាំ១៩៩២ ប្តេជ្ញាចិត្តប្រឆាំងយ៉ាងដាច់ខាតចំពោះការចង់ឲ្យតៃវ៉ាន់ឯករាជ្យ គាំពារនិងជំរុញការអភិវឌ្ឍដោយសន្តិភាពនូវទំនាក់ទំនងនៃត្រើយទាំងសងខាងច្រកសមុទ្រតៃវ៉ាន់។ បន្តអនុវត្តគោលនយោបាយការទូតប្រកបដោយអធិបតេយ្យភាព សន្តិភាពនិងឯករាជ្យ ប្តេជ្ញាចិត្តគាំពារផលប្រយោជន៍ជាស្នូលរបស់ប្រទេសជាតិ ពួតដៃជាមួយនិងប្រទេសនានាដើម្បីបង្កើតសហគមន៍រួមវាសនាតែមួយនិងសហគមន៍មានផលប្រយោជន៍រួម៕
