ថ្ងៃទី ២៦ ខែសីហា រដ្ឋាភិបាលហ្វីលីពីននិងរណសិរ្សប្រជាធិបតេយ្យទូទាំងប្រទេសដែលដឹកនាំដោយបក្សកុម្មុយនិស្តហ្វីលីពីនបានចុះហត្ថលេខាលើសេចក្តីថ្លែងការណ៍រួមនៅក្រុងអូស្លូ រដ្ឋធានីន័រវែស ។ ភាគីទាំងពីរបានឈានដល់មតិឯកភាពគ្នាលើកិច្ចព្រមព្រៀងស្តីពីបទឈប់បាញ់គ្នា និងឯកភាពគ្នាលើការឈប់បាញ់គ្នាដែលគ្មានពេលកំណត់ ។
លោកBorge Brende រដ្ឋមន្រ្តីការបរទេសន័រវែសដែលបានអញ្ជើញចូលរួមពិធីចុះហត្ថលេខាលើសេចក្តីថ្លែងការណ៍រួមនាថ្ងៃដដែលបានមានប្រសាសន៍ថា ក្នុងការចរចាកាលពីប៉ុន្មានថ្ងៃកន្លងទៅ ភាគីទាំងពីរបានឈានដល់មតិឯកភាពគ្នាអំពីបញ្ហាមួយចំនួនដែលជាឧបសគ្គនៃដំណើរវិវត្តន៍ក្នុងការផ្សះផ្សាជាតិក្នុងប៉ុន្មានឆ្នាំចុងក្រោយនេះ ។ អ្វីដែលគួរបញ្ជាក់គឺថា ការឈានដល់មតិឯកភាពគ្នាលើកិច្ចព្រមព្រៀងអំពីបទឈប់បាញ់គ្នាដែលគ្មានពេលកំណត់ មិនធ្លាប់សម្រេចបានក្នុងដំណើរចរចាសន្តិភាពកាលពីមុនទេ ហេតុដូច្នេះអាចកត់សម្គាល់ថា នេះជាការទទួលបានសមិទ្ធផលដ៏ធំនិងសំខាន់ដែលមិនធ្លាប់មាន ។
យោងតាមកិច្ចព្រមព្រៀង ភាគីទាំងពីរនៅបានឯកភាពគ្នាលើការពន្លឿនដំណើរសន្តិភាព ខិតខំឈានដល់មតិឯកភាពគ្នាលើកិច្ចព្រមព្រៀងច្បាប់ទីមួយដែលមានខ្លឹមសារជាក់ស្តែងស្តីអំពីបញ្ហាសេដ្ឋកិច្ចនិងការកែទម្រង់សង្គមក្នុងរយៈពេល ៦ ខែ បន្ទាប់ពីនោះគឺនឹងធ្វើផែនការសម្រាប់ការឈានដល់មតិឯកភាពគ្នាអំពីបញ្ហានយោបាយនិងការធ្វើវិសោធនកម្មរដ្ឋធម្មនុញ្ញ ដើម្បីត្រួសត្រាយផ្លូវសម្រាប់ការចុះហត្ថលេខាលើកិច្ចព្រមព្រៀងចុងក្រោយបំផុតស្តីពីការបញ្ចប់ការប៉ះទង្គិចដោយប្រដាប់អាវុធ ៕
