ក្នុងឱកាសដែលកិច្ចប្រជុំថ្នាក់រដ្ឋមន្រ្តីនៃវេទិកាចិន-សហគមន៍អាមេរិកឡាទីន និងការាបៀនលើកទី ៣ជិតនឹងបើក បណ្តាញទូរទស្សន៍អន្តរជាតិចិននៃអគ្គស្ថានីយវិទ្យុនិងទូរទស្សន៍មជ្ឈិមចិនបានផ្តួចផ្តើមគំនិត និងរួមសហការជាមួយប្រព័ន្ធសារព័ត៌មានសំខាន់ៗចំនួនជាង៣០ ក្នុងតំបន់អាមេរិកឡាទីនដើម្បីចេញផ្សាយគំនិតផ្តួចផ្តើម«ប្រតិបត្តិប្រព័ន្ធសារព័ត៌មានចិននិងអាមេរិកឡាទីន»នៅថ្ងៃទី ២ ខែធ្នូ ។ប្រព័ន្ធសារព័ត៌មានរបស់ចិននិងអាមេរិកឡាទីននឹងរួមសហការគ្នាដើម្បីធ្វើឱ្យស៊ីជម្រៅនូវកិច្ចសហប្រតិបត្តិការ ប្រមូលផ្តុំកម្លាំង និងបង្កើនគំនិតឯកភាពរួមរវាងប្រព័ន្ធសារព័ត៌មានតាមទម្រង់ដូចជាបើកធ្វើវេទិកាតាមអនឡាញ ថតវីដេអូ រៀបចំពិព័រណ៍ភាពយន្ត និងផលិតកម្មវិធីសន្ទនាគ្នារវាងយុវជនជាដើម ។
ថ្លែងក្នុងសុន្ទរកថាតាមប្រព័ន្ធវីដេអូ លោកShen Haixiong អនុរដ្ឋមន្រ្តីក្រសួងឃោសនាការនៃគណៈកម្មាធិការមជ្ឈិមបក្សកុម្មុយនិស្តចិននិងជាអគ្គនាយកនៃអគ្គស្ថានីយវិទ្យុនិងទូរទស្សន៍មជ្ឈិមចិនបានលើកឡើងថា ក្នុងសុន្ទរកថាដែលថ្លែងក្នុងពិធីបើកកិច្ចប្រជុំកំពូលមគ្គុទេ្ទសក៍នៃប្រព័ន្ធសារព័ត៌មានចិននិងអាមេរិកឡាទីនឆ្នាំ ២០១៦ លោកស៊ីជីនភីងប្រធានរដ្ឋចិនបានលើកឡើងថា ការផ្លាស់ប្តូររវាងប្រព័ន្ធសារព័ត៌មានគឺជាចំណែកដ៏សំខាន់នៃទំនាក់ទំនងរវាងប្រទេសចិននិងអាមេរិកឡាទីន ប្រព័ន្ធសារព័ត៌មានចិននិងអាមេរិកឡាទីននឹងទទួលបានសមិទ្ធផលយ៉ាងច្រើនក្នុងការបន្តវេននិងអភិវឌ្ឍចំណងមិត្តភាពរវាងប្រជាជននៃប្រទេសទាំងពីរ ។ អគ្គស្ថានីយវិទ្យុនិងទូរទស្សន៍មជ្ឈិមចិននឹងរួមសហការយ៉ាងមុតមាំជាមួយប្រព័ន្ធសារព័ត៌មានអាមេរិកឡាទីន ដើម្បីធ្វើការអភិវឌ្ឍរួមនិងរក្សាការប្រាស្រ័យទាក់ទងគ្នាយ៉ាងទូលំទូលាយ ប្រកាន់ខ្ជាប់គុណតម្លៃព័ត៌មានដែលប្រកបដោយភាពយុត្តិធម៌និងសត្យានុម័ត ពង្រីកវិស័យផ្លាស់ប្តូរនិងកិច្ចសហប្រតិបត្តិការ ក្នុងន័យរួមចំណែកក្នុងការជំរុញការអភិវឌ្ឍទំនាក់ទំនងរវាងចិននិងអាមេរិកឡាទីនថែមមួយកម្រិតទៀត ៕