យប់ថ្ងៃទី២៥ខែតុលាតាមម៉ោងក្នុងតំបន់ ក្រសួងវប្បធម៌និងព័ត៌មាននៃរដ្ឋាភិបាលអន្តរកាលស៊ូតង់បានចេញសេចក្តីថ្លែងការណ៍ថា ផ្នែកយោធាស៊ូតង់បានធ្វើសកម្មភាពដោយឯកតោភាគីកាលពីថ្ងៃទី២៥ខែតុលាគឺគ្មានភស្តុតាងផ្នែករដ្ឋធម្មនុញ្ញទេ ។ សេចក្តីថ្លែងការណ៍បានបង្ហាញថា រដ្ឋាភិបាលដែលដឹកនាំដោយលោក Abdalla Hamdok ជារដ្ឋាភិបាលអន្តរកាលស្របច្បាប់ ហើយថ្លែងថា បច្ចុប្បន្ននេះ លោក Abdalla Hamdok និងរដ្ឋមន្ត្រីនៃរដ្ឋាភិបាលនេះគឺត្រូវ “ចាប់ពង្រត់”ដោយផ្នែកយោធា ។
តាមដំណឹងនៃក្រសួងសុខាភិបាលស៊ូតង់ឱ្យដឹងថា ពេលផ្នែកយោធាស៊ូតង់បណ្តេញប្រជាពលរដ្ឋដែលធ្វើសកម្មភាពតវ៉ាក្នុងតំបន់បានបណ្តាលឱ្យមនុស្ស៧នាក់ស្លាប់ និងយ៉ាងហោចណាស់១៤០នាក់រងរបួស ។
លោក Abdel Fattah Burhan អតីតប្រធានគណៈកម្មាធិការអធិបតេយ្យភាពរបស់ស៊ូតង់បានថ្លែងសុន្ទរកថាតាមទូរទស្សន៍ ដោយប្រកាសដាក់ស៊ូតង់ក្នុងភាពអាសន្ន ។ លោក Abdel Fattah Burhan បានថ្លែងថា កងទ័ពប្រដាប់អាវុធស៊ូតង់នឹងបន្តអនុវត្តអំណាចអន្តរកាល រហូតដល់ប្រគល់អំណាចទៅឱ្យរដ្ឋាភិបាលថ្មីនៅពេលអនាគត ។
កាលពីថ្ងៃទី២៥ខែតុលា លោក Wang Wenbin អ្នកនាំពាក្យក្រសួងការបរទេសចិនបានថ្លែងនៅពេលឆ្លើយសំណួរក្នុងសន្និសីទសារព័ត៌មានជាប្រចាំថា ភាគីចិនបានយកចិត្តទុកដាក់ការវិវឌ្ឍថ្មីបំផុតនៃស្ថានការណ៍ស៊ូតង់ ហើយអំពាវនាវឱ្យភាគីពាក់ព័ន្ធនានារបស់ស៊ូតង់ដោះស្រាយវិវាទតាមរយៈកិច្ចសន្ទនាគ្នា ដើម្បីគាំពារសន្តិភាពនិងស្ថិរភាពជាតិ ។ បច្ចុប្បន្ននេះ ស្ថានទូតចិនប្រចាំនៅស៊ូតង់បានដំណើរការជាប្រក្រតី ។ ភាគីចិននឹងបន្តយកចិត្តទុកដាក់យ៉ាងដិតដល់ចំពោះការវិវឌ្ឍនៃស្ថានការណ៍ស៊ូតង់ ព្រមទាំងចាត់វិធានការដ៏ចាំបាច់ដើម្បីធានាសុវត្ថិភាពនៃស្ថាប័ននិងបុគ្គលិកចិននៅស៊ូតង់ ។
