នៅថ្ងៃទី ២៥ ខែតុលា តាមម៉ោងក្នុងតំបន់ លោក Zhang Jun តំណាងចិនប្រចាំជាអចិន្ត្រៃយ៍នៅអង្គការសហប្រជាជាតិបានធ្វើសន្និសីទសារព័ត៌មានដើម្បីធ្វើការបកស្រាយពន្យល់ចំពោះសុន្ទរកថាគន្លឹះរបស់លោកប្រធានរដ្ឋចិន Xi Jinping ដែលថ្លែងក្នុងកិច្ចប្រជុំរំលឹកខួបទី ៥០ នៃការដែលសាធារណរដ្ឋប្រជាមានិតចិនទទួលបានអាសនៈស្របច្បាប់ឡើងវិញក្នុងអង្គការសហប្រជាជាតិនៅក្រុងប៉េកាំងនាថ្ងៃដដែលនោះ ។
លោក Zhang Jun បានថែ្លងថា លោក Xi Jinping ប្រធានរដ្ឋចិនបានរំលឹកឡើងវិញនិងបូកសរុបជាប្រព័ន្ធនូវដំណើរដ៏វិសាមញ្ញក្នុងរយៈពេល ៥០ ឆ្នាំកន្លងមកនេះ ។ ៥០ ឆ្នាំនេះជាសាក្សីនៃបម្រែបម្រួលជាប្រវត្តិសាស្ត្រដែលគួរឱ្យកត់សម្គាល់និងការអភិវឌ្ឍពីមួយថ្ងៃទៅមួយថ្ងៃរបស់ប្រទេសចិន ជាសាក្សីនៃការអនុវត្តដោយគ្រប់ជ្រុងជ្រោយនិងធ្វើឱ្យមានភាពស៊ីជម្រៅឥតឈប់ឈរនូវកិច្ចសហប្រតិបត្តិការរវាងចិននិងអង្គការសហប្រជាជាតិ ក៏ដូចជាជាសាក្សីនៃការរក្សាបាននូវភាពនឹងនររបស់ចិនក្នុងការប្រែប្រួលនៃស្ថានការណ៍អន្តរជាតិនិងបានរួមចំណែកដ៏ធំធេងដល់សន្តិភាពនិងការអភិវឌ្ឍរបស់ពិភពលោក ។
លោក Zhang Jun បានលើកឡើងថា លោក Xi Jinping ប្រធានរដ្ឋចិនបានរំលឹកឡើងវិញម្តងទៀតពីការយកចិត្តទុកដាក់និងការគាំទ្ររបស់ប្រទេសចិនចំពោះអង្គការសហប្រជាជាតិ ។ សម្លឹងមើលទៅកាន់អនាគត កិច្ចសហប្រតិបត្តិការរវាងចិននិងអង្គការសហប្រជាជាតិកំពុងឈរនៅចំណុចចាប់ផ្តើមថ្មីនៃប្រវត្តិសាស្ត្រ ។ ចំណុចចាប់ផ្តើមថ្មីគឺមានន័យថា អនាគតដ៏ភ្លឺស្វាង កាលានុវត្តភាពកាន់តែច្រើន ក៏ដូចជាត្រូវប្រឈមបញ្ហាកាន់តែធំនិងមានទំនួលខុសត្រូវកាន់តែសំខាន់ផងដែរ ៕