ថ្ងៃទី២៥ ខែតុលា ក្នុងសន្និសីទសារព័ត៌មានជាប្រចាំ លោក Wang Wenbin អ្នកនាំពាក្យក្រសួងការបរទេសចិនបានប្រកាសថា តបតាមសេចក្តីអញ្ជើញរបស់ព្រះចៅស៊ុលតង់Haji Hassanal Bolkiahនៃប្រទេសប្រ៊ុយណេដែលជាប្រធានផ្លាស់វេននៃសមាគមអាស៊ាន លោក Li Keqiang នាយករដ្ឋមន្ត្រីចិននឹងចូលរួមកិច្ចប្រជុំកំពូលចិន-អាស៊ានលើកទី២៤ កិច្ចប្រជុំកំពូលអាស៊ាននិងចិន ជប៉ុន កូរ៉ខាងត្បូងលើកទី២៤ និងកិច្ចប្រជុំកំពូលអាស៊ីបូព៌ាលើកទី១៦ ពីថ្ងៃទី២៦ដល់ថ្ងៃទី២៧ ខែតុលា ។ កិច្ចប្រជុំកំពូលទាំងនេះនឹងប្រារព្វធ្វើតាមប្រព័ន្ធវីដេអូ ។
លោក Wang Wenbin បានថ្លែងថា ប្រទេសចិនចាត់ទុកអាស៊ានជាទិសដៅអាទិភាពនៃកិច្ចការទូតរបស់ខ្លួន ហើយបានយកចិត្តទុកដាក់ខ្ពស់ដល់កិច្ចសហប្រតិបតិ្តការនៅតំបន់អាស៊ីបូព៌ាជាប់រហូត ។ ឆ្នាំនេះជាខួបទី៣០នៃការបង្កើតទំនាក់ទំនងសន្ទនារវាងចិននិងអាស៊ាន ។ ភាគីទាំងពីរកំពុងធ្វើការខិតខំប្រឹងប្រែង ក្នុងន័យជំរុញទំនាក់ទំនងភាពជាដៃគូយុទ្ធសាស្ត្រឱ្យលើកកម្ពស់ថែមទៀត និងបង្កើតជាសហគមន៍រួមវាសនាដែលមានភាពកាន់តែស្អិតល្មួត ជឿជាក់ថា ប្រការនេះនឹងបំពេញបន្ថែមកម្លាំងចលករថ្មីដល់កិច្ចសហប្រតិបតិ្តការអាស៊ីបូព៌ាឥតឈប់ឈរ ។
លោក Wang Wenbin បានលើកឡើងទៀតថា បច្ចុប្បន្ននេះ ជំងឺកូវីដ១៩បាននិងកំពុងរីករាលដាលក្នុងតំបន់ជាបន្តបន្ទាប់ ការងើបឡើងវិញនៃសេដ្ឋកិច្ចគ្មានតុល្យភាព ប្រទេសមួយចំនួនតូចឃុបឃិតគ្នាដើម្បីបង្កើតជាក្រុមសម័្ពន្ធតូច ដូច្នេះ កិច្ចសហប្រតិបតិ្តការនៃអាស៊ីបូព៌ាប្រឈមនឹងកត្តាស្មុគស្មាញកាន់តែច្រើនឡើងៗ ។ ប្រទេសចិនរំពឹងទុកយកឱកាសនៃកិច្ចប្រជុំកំពូលពាក់ព័ន្ធលើកនេះ អាចប្រមូលផ្តុំគំនិតឯកភាពរួម ធ្វើឱ្យកិច្ចសហប្រតិបតិ្តការមានភាពកាន់តែស៊ីជម្រៅ ក៏ដូចជារួមគ្នាគាំពារទិសដៅត្រឹមត្រូវនៃកិច្ចសហប្រតិបតិ្តការអាស៊ីបូព៌ា ក៏ដូចជាវិបុលភាពនិងស្ថិរភាពក្នុងតំបន់ ៕
