ចាប់ពីថ្ងៃទី ២១ ដល់ថ្ងៃទី ២៣ ខែកក្កដា លោក Xi Jinping អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិន និងជាប្រធានរដ្ឋចិន ប្រធានគណៈកម្មាធិការយោធាមជ្ឈិមចិនបានទៅដល់ភូមិភាគស្វយ័ត Xizang ដើម្បីចូលរួមអបអរសាទរខួប ៧០ ឆ្នាំនៃការរំដោះ Xizang ដោយសន្តិវិធី។
រលៀលថ្ងៃទី ២២ ខែកក្កដា លោក Xi Jinping បានទៅដល់វត្ត Drepung ដែលស្ថិតនៅជាយក្រុង Lhasa ដើម្បីស្វែងយល់ពីការងារសាសនានិងវិធានការច្នៃប្រឌិតថ្មីខាងការគ្រប់គ្រងវត្តអារាម។ លោកបានកោតសរសើរលើការចូលរួមចំណែកនៃវត្ត Drepung ក្នុងច្រើនឆ្នាំកន្លងមក ។ លោកបានគូសបញ្ជាក់ថា ត្រូវបន្តអនុវត្តគោលការណ៍ណែនាំជាមូលដ្ឋានខាងការងារសាសនារបស់បក្ស គោរពជំនឿសាសនារបស់មហាជន គ្រប់គ្រងកិច្ចការសាសនាតាមផ្លូវច្បាប់ ដើម្បីជំរុញឱ្យសាសនាដើរតួនាទីវិជ្ជមានក្នុងការអភិវឌ្ឍសង្គមកិច្ច ។
នៅទីលាន Potala លោក Xi Jinping បានសំណេះសំណាលយ៉ាងស្និទ្ធស្នាលជាមួយមហាជនគ្រប់ជនជាតិដោយលើកឡើងថា រយៈពេល ៧០ ឆ្នាំបន្ទាប់ពីត្រូវបានរំដោះដោយសន្តិវិធី ជីវភាពរស់នៅគ្រប់ជនជាតិនៅ Xizang បានផ្លាស់ប្តូរជាខ្លាំង។ បក្សកុម្មុយនិស្តចិនបានបំពេញបុព្វហេតុដែលត្រូវធ្វើ។ ជនជាតិទាំង ៥៦ របស់ប្រទេសចិន រួមគ្នាបង្កើតជាសហគមន៍រួមប្រជាជាតិចិន យើងនឹងបន្តឈានទៅរកគោលដៅតស៊ូ១០០ឆ្នាំទីពីរជាមួយគ្នា៕
