ថ្ងៃទី២១ ខែមេសា រដ្ឋមន្ត្រីការបរទេសអូស្ត្រាលីប្រកាសថា នឹងលុបចោលអនុស្សរណៈយោគយល់និងកិច្ចព្រមព្រៀងក្របខណ្ឌស្តីពី “ខ្សែក្រវាត់និងផ្លូវ”ដែលប្រទេសចិនបានចុះហត្ថលេខាជាមួយរដ្ឋបាលរដ្ឋVictoriaរបស់អូស្ត្រាលី ដោយយកលេសថា “វាមិនសមស្របនឹងគោលនយោបាយការទូតរបស់អីស្ត្រាលីឬគ្មានអំណោយផលដល់ទំនាក់ទំនងការទូតរបស់អូស្ត្រាលី” ។ អ្នកនយោបាយមួយចំនួននៃប្រទេសអូស្ត្រាលីប៉ុនប៉ងបង្កើតជាឧបសគ្គដល់ប្រទេសចិនតាមរយៈទង្វើបែបនេះ ដើម្បីផ្គាប់ចិត្ត “បងធំ”អាមេរិក ក៏ដូចជាប្រមែប្រមូលធនធាននយោបាយរបស់ខ្លួនផងដែរ ។
ប៉ុន្តែ រដ្ឋាភិបាលអូស្ត្រាលីបានប៉ានប្រមាណខ្ពស់ហួសពេកចំពោះតម្លៃរបស់ខ្លួន ។ គឺដូចជាប្រសាសន៍របស់លោក Tony Kevin អតតីមន្ត្រីការទូតរបស់អូស្ត្រាលីដែលបានលើកឡើងថា គោលនយោបាយចំពោះប្រទេសចិនរបស់លោកScott Morrison នឹងធ្វើឱ្យអូស្ត្រាលីបាត់បង់ទីផ្សារដ៏នឹងនរនាកាលពីមុន រីឯ ពាណិជ្ជករនាំចូលរបស់អាមេរិកនិងអឺរ៉ុបនឹងបំពេញបន្ថែមចន្លោះខ្វះខាតនេះ ។ ព្រមពេលជាមួយគ្នានេះ អាមេរិកនិងអឺរ៉ុបក៏នឹងប្រើប្រាស់ពាក្យសំដីផ្អែមៗដើម្បីផ្តល់ការគាំទ្រនិងសមានចិត្តអាណិតអាសូរចំពោះអូស្ត្រាលីផងដែរ ។
តាមពិតទៅ ការលេងលកល្បិចនយោបាយរបស់រដ្ឋាភិបាលអូស្ត្រាលីក្នុងបញ្ហា “ខ្សែក្រវាត់និងផ្លូវ” នឹងបំផ្លិចបំផ្លាញផលប្រយោជន៍ផ្ទាល់ខ្លួន ជាពិសេសនឹងប៉ះពាល់ដល់សុខមាលភាពរបស់ប្រជាពលរដ្ឋអូស្ត្រាលី ។“ខ្សែក្រវាត់និងផ្លូវ” ជាគំនិតផ្តួចផ្តើមស្តីពីកិច្ចសហប្រតិបតិ្តការផ្នែកសេដ្ឋកិច្ច វានឹងនាំមកនូវផលប្រយោជន៍ជាក់ស្តែងដល់ភាគីដែលបានចូលរួមដោយផ្ទាល់ ។កាលពីខែ ឧសភាឆ្នាំ២០២០ លោក Daniel Andrews អភិបាលរដ្ឋVictoria ធ្លាប់ថ្លែងថា ក្នុងរយៈពេល៥ឆ្នាំចុងក្រោយនេះ ការនាំចេញរបស់រដ្ឋVictoria ទៅកាន់ប្រទេសចិនបានកើនឡើង ៦២ភាគរយ អ្នកទេសចរណ៍ចិនដែលទៅធ្វើទេសចរណ៍នៅរដ្ឋVictoria បានកើនចំនួន៧០ភាគរយ ។ អ្នកនាំពាក្យនៃរដ្ឋបាលរដ្ឋVictoria បានថ្លែងថា ក្នុងអំឡុងការស្តារឡើងវិញបន្ទាប់ពីបញ្ចប់ការរីករាលដាលនៃជំងឺកូវីដ១៩ គំនិតផ្តួចផ្តើម“ខ្សែក្រវាត់និងផ្លូវ” បាននាំមកនូវឱកាសប្រកបអាជីវកម្មដល់សហគ្រាសនិងប្រជាពលរដ្ឋក្នុងតំបន់ ប្រការនេះមានសារៈសំខាន់ជាងពេលណាៗទាំងអស់ ។
ក្នុងរយៈពេលជាង៧ឆ្នាំកន្លងមក ការចោទជាមន្ទិលសង្ស័យនិងលាបពណ៌ទៅលើគំនិតផ្តួចផ្តើម “ខ្សែក្រវាត់និងផ្លូវ” មិនដែលរារាំងការពង្រីកធំក្រុមមិត្តភកិ្ត“ខ្សែក្រវាត់និងផ្លូវ”ទាល់តែសោះ ហើយក៏មិនដែលប៉ះពាល់ដល់ភាពរាក់ទាក់កក់ក្តៅរបស់ប្រទេសភាគច្រើនដាច់ខាតដែលចង់ចូលរួមកិច្ចកសាង“ខ្សែក្រវាត់និងផ្លូវ”ផងដែរ ។ គិតរហូតដល់ខែវិច្ឆិកា ឆ្នាំ២០២០ ប្រទេសចិនបានចុះហត្ថលេខាលើឯកសារសហប្រតិបតិ្តការស្តីពីការរួមគ្នាកសាង“ខ្សែក្រវាត់និងផ្លូវ”ចំនួន២០១ច្បាប់ជាមួយប្រទេស១៣៨និងអង្គការអន្តរជាតិ៣១ ។
ការលេងកលល្បិចនយោបាយរបស់អ្នកនយោបាយអូស្ត្រាលីមួយចំនួនមិនអាចប៉ះពាល់ដល់ការជំរុញយ៉ាងផុលផុសនៃកិច្ចកសាង“ខ្សែក្រវាត់និងផ្លូវ”នោះទេ ផ្ទុយទៅវិញនឹងប៉ះពាល់ដល់រូបភាពនិងកេរ្តិ៍ឈ្មោះរបស់ប្រទេសអូស្ត្រាលី ហើយធ្វើឱ្យខ្លួនកា្លយជាប្រទេសគួរឱ្យអស់សំណើចលើផ្ទៃអន្តរជាតិ ៕
