យប់ថ្ងៃទី២២ ខែកុម្ភៈ លោក Xi Jinping ប្រធានរដ្ឋចិនបានជួបពិភាក្សាតាមទូរស័ព្ទជាមួយលោក Sadyr Zhaparov
ប្រធានាធិបតីកៀហ្ស៊ីស៊ីស្ថាន។
លោក Xi Jinping បានថ្លែងថា តាំងពីប្រទេសចិននិងប្រទេសកៀហ្ស៊ីស៊ីស្ថានបានបង្កើតទំនាក់ទំនងការទូតអស់រយៈពេល២៩ឆ្នាំមក ទំនាក់ទំនងរវាងប្រទេសទាំងពីរបានឆ្លងកាត់បញ្ហាប្រឈមនៃបម្រែបម្រួលស្ថានការណ៍អន្តរជាតិ បានរក្សានិន្នាការអភិវឌ្ឍន៍ប្រកបដោយស្ថិរភាពនិងល្អប្រសើរ។ ភាគីទាំងពីរបានគាំទ្រគ្នាយ៉ាងមុតមាំក្នុងបញ្ហាដែលពាក់ព័ន្ធនឹងផលប្រយោជន៍ស្នូលរបស់គូភាគី។ ការកសាងខ្សែក្រវាត់និងផ្លូវទទួលបានសមិទ្ធផលច្រើន ក្នុងកិច្ចការអន្តរជាតិវិញក៏បានសហការគ្នាយ៉ាងជិតស្និទ្ធដែរ។ ចិនមានឆន្ទៈរួមជាមួយកៀហ្ស៊ីស៊ីស្ថាន ដើម្បីក្តាប់នូវសភាពការណ៍អភិវឌ្ឍន៍ទំនាក់ទំនងនៃប្រទេសទាំងពីរ ក្នុងន័យជំរុញឱ្យទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយចិន-កៀហ្ស៊ីស៊ីស្ថានឡើងដល់កម្រិតថ្មីថែមទៀត។
ជាការឆ្លើយតប លោក Sadyr Zhaparov បានថ្លែងថា ចិនជាអ្នកជិតខាងល្អ មិត្តល្អ និងដៃគូល្អរបស់កៀហ្ស៊ីស៊ីស្ថាន។ កៀហ្ស៊ីស៊ីស្ថានសូមគាំទ្រយ៉ាងមុតមាំលើគោលជំហររបស់ចិនក្នុងបញ្ហាហុងកុង ស៊ីនជាំង និងតៃវ៉ាន់ជាដើម ដែលជាផលប្រយោជន៍ស្នូលរបស់ចិន ក៏ដូចជាគោរពគោលការណ៍ចិនតែមួយ។កៀហ្ស៊ីស៊ីស្ថានសូមស្វាគមន៍សហគ្រាសចិនមកបណ្តាក់ទុននៅកៀហ្ស៊ីស៊ីស្ថាន ព្រមទាំងរួមជាមួយចិន សំដៅជំរុញកិច្ចសហប្រតិបត្តិការលើគម្រោងធំៗដូចជាផ្លូវដែកជាដើម ដើម្បីបន្តរួមគ្នាកសាងខ្សែក្រវាត់និងផ្លូវប្រកបដោយគុណភាពខ្ពស់៕
