អង្គការសុខភាពពិភពលោកបានប្រកាសថា ក្រុមអ្នកវិទ្យាសាស្ត្រអន្តរជាតិដែលមានអ្នកជំនាញល្បីៗមកពីប្រទេសនិងអង្គការចំនួន១០បានធ្វើដំណើរទៅកាន់ប្រទេសចិន ដើម្បីរួមជាមួយអ្នកជំនាញចិនធ្វើការសិក្សាស្រាវជ្រាវវិទ្យាសាស្ត្រដើម្បីស្វែងរកប្រភពដើមនៃវីរុសកូវីដ១៩ចាប់ពីថ្ងៃទី១៤ខែមករានេះតទៅ ។ លោកស្រី Harris អ្នកនាំពាក្យនៃអង្គការសុខភាពពិភពលោកបានផ្តល់បទសម្ភាសន៍ពិសេសមួយ លោកស្រីបានលើកឡើងយ៉ាងលម្អិតអំពីខ្លឹមសារនិងក្របខ័ណ្ឌដែលក្រុមអ្នកជំនាញអន្តរជាតិនិងអ្នកជំនាញចិននឹងសិក្សាស្រាវជ្រាវ ។ លោកស្រី Harris បានថ្លែងថា អ្នកជំនាញទាំងអស់នឹងស្វែងយល់និងស្រាវជ្រាវថែមមួយកម្រិតទៀតអំពីករណីឆ្លងជំងឺកូវីដ១៩មុនគេបង្អស់ដែលប្រកាសដោយក្រុងវូហាន លទ្ធភាពឆ្លងនិងការសិក្សាស្រាវជ្រាវអំពីប្រភេទសត្វខុសគ្នាដែលប្រហែលពាក់ព័ន្ធនឹងជំងឺកូវីដ១៩ជាដើម ។ ក្នុងអំឡុងពេលនៅប្រទេសចិន ក្រុមសិក្សាស្រាវជ្រាវនេះនឹងប្រើប្រាស់មធ្យោបាយជាច្រើន រួមទាំងការសិក្សាស្រាវជ្រាវអំពីសេរ៉ូមនិងការសិក្សាស្រាវជ្រាវអំពីអង្គបដិប្រាណនៅបន្ទប់ពិសោធន៍ជាដើម ។ លោកស្រីបណ្ឌិត Harris បានគូសបញ្ជាក់ថា យើងមិនអាចរំពឹងទុកការសិក្សាស្រាវជ្រាវនៃក្រុមអ្នកជំនាញលើកនេះអាចរកឃើញចម្លើយត្រឹមត្រូវនៃបញ្ហាពាក់ព័ន្ធនោះទេ ។ ពីព្រោះការសិក្សាស្រាវជ្រាវអំពីជំងឺឆ្លងជាសកល ត្រូវការពេលវេលាគ្រប់គ្រាន់ ។ លោកស្រីបានលើកឡើងជាពិសេសថា ភារកិច្ចលើកនេះរបស់ក្រុមអ្នកវិទ្យាសាស្ត្រអន្តរជាតិគឺ ឆ្លងតាមរយៈការចែករំលែកទិន្នន័យនិងលទ្ធផលសិក្សាស្រាវជ្រាវ ប្រើប្រាស់ចំណេះដឹងឯកទេស រួមគ្នាលើកឡើងពីការប៉ាន់ប្រមាណនៃការស្រាវជ្រាវ និងលើកឡើងបញ្ហាពាក់ព័ន្ធ ។ អ្នកនាំពាក្យនៃអង្គការសុខភាពពិភពលោករូបនេះបានបង្ហាញយ៉ាងច្បាស់ថា ដំណើរសិក្សាស្រាវជ្រាវលើកនេះគ្មានទំនាក់ទំនងជាមួយនឹងនយោបាយទេ “ដូចជាលោកអគ្គនាយកអង្គការសុខភាពពិភពលោកបានថ្លែងដូច្នេះថា ដំណើរសិក្សាស្រាវជ្រាវជាការងារវិទ្យាសាស្ត្រ គ្មានទំនាក់ទំនងជាមួយនឹងនយោបាយទេ ត្រូវដាក់នយោបាយឱ្យនៅដាក់ដោយឡែក ។”
