ថ្ងៃទី៣ខែកញ្ញាឆ្នាំ២០២០ ជាទិវារំលឹកខួបទី៧៥នៃជ័យជម្នះរបស់ប្រជាជនចិនក្នុងសង្គ្រាមប្រឆាំងការឈ្លានពានរបស់ជប៉ុននិងជាសង្គ្រាមប្រឆាំងហ្វាស៊ីសជាសកល ។ ៧៥ឆ្នាំមុន ប្រជាជនចិនឆ្លងកាត់ការប្រយុទ្ធប្រកបដោយភាពលំបាកលំបិនអស់រយៈពេល១៤ឆ្នាំ ទទួលបានជ័យជម្នះដ៏មហិមានៃសង្គ្រាមប្រឆាំងការឈា្លនពានរបស់ជប៉ុន ត្រួសត្រាយអនាគតដ៏ភ្លឺស្វាងនៃការស្តារភាពរុងរឿងឡើងវិញដ៏មហិមារបស់ប្រជាជាតិចិន ហើយរួមចំណែកដ៏ធំសម្បើមដែលគួរឱ្យកត់ត្រាក្នុងប្រវត្តិសាស្ត្រសម្រាប់សន្តិភាពពិភពលោក ។ ចាត់ទុកប្រវត្តិសាស្ត្រជាមេរៀនអាចស្វែងយល់ពីអនាគត មនុស្សជាតិដែលធា្លប់ទទួលរងទុក្ខវេទនាឈឺចាប់ពីសង្គ្រាមមិនចង់កើតសង្គ្រាមម្តងទៀត សន្តិភាពនិងការអភិវឌ្ឍបានក្លាយជានិន្នាការពិភពលោកនាពេលបច្ចុប្បន្ន ។
លោក Friedrich Engels ធ្លាប់បាននិយាយថា គ្មានគ្រោះមហន្តរាយប្រវត្តិសាស្ត្រដ៏ខ្លាំងក្លាណាមួយមិនយកវឌ្ឍនភាពប្រវត្តិសាស្ត្រជាសំណងនោះទេ ។ បន្ទាប់ពី៧៥ឆ្នាំកន្លងទៅនេះ ប្រទេសចិនបានក្លាយជាអង្គភាពសេដ្ឋកិច្ចធំទីពីរលើពិភពលោក ការយកជម្នះលើឧបសគ្គក្នុងការលុបបំបាត់ភាពក្រីក្របានឈានចូលឆ្នាំគន្លឹះ ។ បញ្ហាក្រីក្រដែលបានរំខានដល់ប្រជាជាតិចិនក្នុងរយៈពេលជាយូរណាស់មកហើយជិតនឹងត្រូវដោះស្រាយ ការកសាងបានសង្គមដែលប្រជាជនមានជីវភាពធូរធារបង្គួរដោយគ្រប់ជ្រុងជ្រោយនិងគោលដៅសតវត្សរ៍ទីមួយជិតនឹងសម្រេចបានហើយ ។
ប៉ុន្តែ ប្រការដែលគួរឱ្យព្រួយបារម្ភនោះគឺ ក្នុងបរិបទដែលជំងឺកូវីដ១៩បានវាយប្រហារនិម្មាបនកម្មសេដ្ឋកិច្ចនិងនយោបាយពិភពលោកនាពេលបច្ចុប្បន្ន អ្នកនយោបាយអាមេរិកមួយចំនួនបានប្រព្រឹត្តផ្ទុយនឹងនិន្នាការ បំផុស “សង្គ្រាមត្រជាក់ថ្មី”យ៉ាងគឃ្លើន ញុះញង់អបគមន៍និយមនិងបដិបក្ខគ្នា ប៉ុនប៉ងបង្កការតតាំងគ្នារវាងចិននិងពិភពលោក ។ ប្រសិនបើបណ្តោយឱ្យមនុស្សទាំងនេះប្រព្រឹត្តទៅតាមតែទំនើងចិត្តដើម្បីស្វែងរកផលប្រយោជន៍ផ្ទាល់ខ្លួនខាងនយោបាយ នោះ មិនគ្រាន់តែនឹងបំផ្លាញដល់ផលប្រយោជន៍មូលដ្ឋានរបស់ប្រទេសទាំងពីរចិននិងសហរដ្ឋអាមេរិកប៉ុណ្ណោះទេ ថែមទាំងក៏នឹងធ្វើឱ្យសន្តិភាព ស្ថិរភាពនិងការអភិវឌ្ឍជាសកលធ្លាក់ក្នុងជ្រោះដ៏គ្រោះថ្នាក់យ៉ាងខ្លាំង ។
ថ្ងៃនេះ យើងរំលឹកជ័យជម្នះនៃសង្គ្រាមប្រឆាំងការឈ្លានពានរបស់ជប៉ុន គឺត្រូវតែចាត់ទុកប្រវត្តិសាស្ត្រជាមេរៀន ត្រូវតែគាំពារយ៉ាងមុតមាំនូវសន្តិភាពនិងស្ថិរភាពដែលបានមកដោយមិនងាយ ។ ពិតមែនតែមានមនុស្សមួយចំនួនតែងតែចង់បង្ករឿងហេតុក៏ដោយ ក៏ប៉ុន្តែប្រវត្តិសាស្ត្របានបង្ហាញម្តងហើយម្តងទៀតថា ការប្រព្រឹត្តទង្វើខុសឆ្គងមុខជានឹងបរាជ័យជាមិនខាន! យើងគួរតែរួមសុខរួមទុក្ខរួមគ្នាពុះពារឧបសគ្គ និងជំរុញកិច្ចសហប្រតិបត្តិការនិងឈ្នះ-ឈ្នះក្នុងការផ្លាស់ប្តូរនិងរៀនសូត្រពីគ្នា ។ មានតែប្រមូលផ្តុំកម្លាំងយ៉ាងខ្លាំងក្លាសម្រាប់ការពារសន្តិភាពក្នុងក្របខ័ណ្ឌពិភពលោក ទើបមនុស្សជាតិយើងអាចដើរឆ្ពោះទៅកាន់អនាគតកាន់តែភ្លឺស្វាងបាន ។
