រដ្ឋាភិបាលលីបង់បានបើកធ្វើកិច្ចប្រជុំបន្ទាន់មួយលើកកាលពីថ្ងៃទី ៥ ខែសីហា ដោយប្រកាសថា រដ្ឋធានីបេរូតជាទីក្រុងរងគ្រោះមហន្តរាយ ដូចនេះតម្រូវឱ្យផែ្នកយោធាត្រួតពិនិត្យការអនុវត្តការដាក់ទីក្រុងបេរូតក្នុងភាពអាសន្នរយៈពេល ២ សប្តាហ៍។រដ្ឋាភិបាលក៏ដាស់តឿនដល់អាជ្ញាធរពាក់ព័ន្ធឱ្យចាត់វិធានការដើម្បីផ្តល់ជំនួយឧបត្ថម្ភដល់ជនរងគ្រោះ ក្នុងនោះបូករួមទាំង ការបើកទីតាំងផ្សេងៗ ដូចជា សាលារៀន សណ្ឋាគារជាដើមដើម្បីផ្តល់ទីជម្រកដល់អ្នកគ្មានលំនៅដ្ឋាននិងធានាឱ្យបាននូវការផ្គត់ផ្គង់សម្ភារៈសម្រាប់ជីវភាពប្រចាំថៃ្ង។
លោក Hamad Hassan រដ្ឋមន្ត្រីក្រសួងសុខាភិបាលលីបង់បានថែ្លងនៅយប់ថ្ងៃដដែលនោះថា ករណីផ្ទុះដែលកើតឡើងកាលពីថ្ងៃទី ៤ ខែសីហា បានបណ្តាលឱ្យមនុស្ស ១៣៥ នាក់ស្លាប់និងប្រហែល ៥០០០ នាក់រងរបួស ព្រមទាំងរាប់សិបនាក់ទៀតកំពុងបាត់ខ្លួន៕
