នាពេលថ្មីៗកន្លងទៅនេះ លោកស្រី Shrutee Sarkarអ្នកសារព័ត៌មាននៃទីភ្នាក់ងារសារព័ត៌មាន Reuters បានតែងអត្ថបទចង្អុលយ៉ាងច្បាស់ថា “មុនពេលរាតត្បាតនៅទូទាំងពិភពលោកនៃជំងឺកូវីដ១៩ អាមេរិកធ្លាប់ជាក្បាលម៉ាស៊ីនសំខាន់នៃកំណើនសេដ្ឋកិច្ចពិភពលោក ប៉ុន្តែបច្ចុប្បន្ននេះ បានក្លាយជាហានិភ័យធំបំផុតទៅហើយ” ។
ក្នុងបរិបទការរាលដាលនៃជំងឺកូវីដ១៩ ពិតមែនតែប្រព័ន្ធបម្រុងសហព័ន្ធអាមេរិកបានសន្យាថានឹងចាត់វិធានការរំញោចជាអតិបរមាសម្រាប់ផ្តល់ការគាំទ្រដល់អង្គភាពសេដ្ឋកិច្ចធំជាងគេនៅលើពិភពលោកមួយនេះ ប៉ុន្តែនៅតែមិនអាចទប់ស្កាត់ការធ្លាក់ចុះយ៉ាងខ្លាំងរបស់សេដ្ឋកិច្ចអាមេរិកនោះឡើយ ។ នាប៉ុន្មានថ្ងៃកន្លងទៅនេះ សន្ទស្សន៍ដុល្លារអាមេរិកបានធ្លាក់ចុះដល់កម្រិតទាបបំផុតក្នុងរយៈពេលពីរឆ្នាំកន្លងមក ហើយជាងនេះទៅទៀតនៅខែកក្កដា សន្ទស្សន៍ប្រចាំខែនេះបានធ្លាក់ចុះដោយកម្រិតខ្លាំងបំផុតក្នុងរយៈពេលជិត១០ឆ្នាំកន្លងមក ចាប់ពីខែមិនាមក ចំនួនអ្នកបាត់អាជីពនៅអាមេរិក សរុបបានលើសពី៥១លាននាក់ហើយ ផលិតផលក្នុងស្រុកសរុបនៅត្រីមាសទី២របស់អាមេរិក បើគិតតាមអត្រាប្រចាំឆ្នាំ បានធ្លាក់ចុះ៣២,៩ភាគរយ ដែលជាកម្រិតធ្លាក់ចុះខ្លាំងបំផុតតាំងពីមានកំណត់កាលនាឆ្នាំ ១៩៤៧មក ។
កំហុសធ្ងន់ធ្ងរបំផុតរបស់រដ្ឋាភិបាលអាមេរិកអាណត្តិនេះក្នុងអំឡុងពេលទប់ទល់នឹងជំងឺកូវីដ១៩ គឺមិនដោះស្រាយបញ្ហាវីរុសតាមបែបវិទ្យាសាស្ត្រ បែរជាតាមបែបនយោបាយ ។ ក្នុងនាមជាប្រទេសមហាអំណាចតែមួយគត់នៅលើពិភពលោក ជំនឿចិត្តពីសាធារណជន និងសមត្ថភាពដឹកនាំបាននិងកំពុងឈានដល់កម្រិតទាបបំផុតក្នុងប្រវត្តិសាស្ត្រ ប្រការទាំងនេះគឺដោយសារអាមេរិកប្រកាន់ខ្ជាប់គោលការណ៍“អាមេរិកអាទិភាព” ឯកតោភាគីនិយមដែលធ្វើតាមតែទំនើងចិត្តរបស់ខ្លួននិងអំពើអនុត្តរភាពដ៏សុទ្ធសាធ ។
លើវិស័យសេដ្ឋកិច្ច អាមេរិកបាននិងកំពុងក្លាយជាហានិភ័យសំខាន់ក្នុងការងើបឡើងវិញនៃសេដ្ឋកិច្ចពិភពលោក ។ ទំហំសេដ្ឋកិច្ចអាមេរិកប្រហែលត្រូវជា១ភាគ៤នៃទំហំសេដ្ឋកិច្ចពិភពលោក ការថមថយចុះរបស់សេដ្ឋកិច្ចអាមេរិកពិតជានឹងមានផលប៉ះពាល់យ៉ាងខ្លាំងដល់សេដ្ឋកិច្ចពិភពលោក ។ នេះម្យ៉ាង ម្យ៉ាងទៀត ការរីករាលដាលនៃជំងឺឆ្លងបានវាយប្រហារយ៉ាងធ្ងន់ធ្ងរទៅលើមុខរបរភោជ្ជនិយដ្ឋាននិងទេសចរណ៍ជាដើម ដែលបានបណ្តាលឱ្យមនុស្សជាច្រើនបាត់បង់ឱកាសការងារ និងការចាយវាយធ្លាក់ចុះ ព្រមនិងកាត់បន្ថយការនាំចូល ។ កក្តាទាំងនេះបានជះឥទ្ធិពលអវិជ្ជមានដល់ការងើបឡើងវិញនៃសេដ្ឋកិច្ចពិភពលោក ។
បច្ចុប្បន្ននេះ អាមេរិកបានរកឃើញករណីឆ្លងជំងឺកូវីដ១៩សរុបលើសពី៤លាន៧សែនករណី និងករណីស្លាប់លើសពី១៥ម៉ឺននាក់ ប៉ុន្តែ ជំងឺឆ្លងនៅតែរីករាលដាលជាបន្តបន្ទាប់ ។ បាតុភូតទាំងអស់បង្ហាញថា នៅក្រោមការអសមត្ថភាពរបស់អ្នកនយោបាយអាមេរិកមួយចំនួនដែលតម្កល់ទុកផលប្រយោជន៍ផ្ទាល់ខ្លួនក្នុងឋានៈចម្បង ប្រទេសមហាអំណាចនេះបានធ្លាក់ខ្លួនក្នុងភាពលំបាកយ៉ាងខ្លាំងដែលនឹងទទួលរងផលវិបាកដ៏ធ្ងន់ធ្ងរ៕