កាលពីថ្ងៃទី ១៣ ខែកក្កដា តាមម៉ោងនៅក្នុងតំបន់ លោក Anthony S. Fauci អ្នកជំនាញផ្នែកជំងឺឆ្លងដ៏ល្បីល្បាញរបស់អាមេរិកនិងជាប្រធានវិទ្យាស្ថានជាតិសិក្សាស្រាវជ្រាវអំពីជំងឺអាឡែរហ្ស៊ីនិងជំងឺឆ្លងនៃអាមេរិកបានលើកឡើងថា ការរីករាលដាលនៃជំងឺកូវីដ ១៩ គឺជាវិបត្តិសន្តិសុខសុខាភិបាលសាធារណៈធ្ងន់ធ្ងរបំផុតដែលសហរដ្ឋអាមេរិកបានប្រឈមនាពេលបច្ចុប្បន្ន។បើប្រៀបធៀបនឹងវីរុសផ្សេងទៀត ដូចជា អេដស៍និងអេបូឡាជាដើម ជំងឺកូវីដ ១៩ គឺមាន"ភាពប្រឈមខ្លាំងបំផុត"។
លោក Anthony S. Fauci បានថែ្លងទៀតថា ក្នុងដំណើរស្តារសេដ្ឋកិច្ចឡើងវិញ រដ្ឋបាលនៃរដ្ឋមួយចំនួនរបស់សហរដ្ឋអាមេរិកមិនបានគោរពតាមច្បាប់នៃការស្តារឡើងវិញនោះទេ ពោលគឺ"មិនអើពើនឹងការព្រមានទាល់តែសោះ"។
លោក Anthony S. Fauci បានសង្កត់ធ្ងន់ថា ពួកយើងមិនបានរកឃើញតម្រុយណាដែលបញ្ជាក់ថា ការរីករាលដាលនៃជំងឺឆ្លងត្រូវបញ្ចប់នោះទេ។ប្រសិនបើចង់ឱ្យសិស្សានុសិស្សត្រឡប់ទៅសាលារៀនវិញ នោះ សហរដ្ឋអាមេរិកត្រូវតែមានសមត្ថភាពគ្រប់គ្រងការរីករាលដាលនៃជំងឺនេះជាមុនសិន៕
