កាលពីថ្ងៃទី ១៧ ខែសីហា នៅលើបណ្តាញទំនាក់ទំនងសង្គមរបស់ខ្លួន លោក Imran Khan នាយករដ្ឋមន្រ្តីប៉ាគីស្ថានបានសម្តែងការស្វាគមន៍ចំពោះកិច្ចពិគ្រោះពិភាក្សារបស់ក្រុមប្រឹក្សាសន្តិសុខនៃអង្គការសហប្រជាជាតិស្តីពីតំបន់ Kashmir ។លោកបានថែ្លងថា ក្រុមប្រឹក្សាសន្តិសុខបានអនុម័តនូវសេចក្តីសម្រេចចិត្តមួយចំនួនលើបញ្ហា Kashmir ដែលនេះគឺជាការអះអាងជាថ្មីឡើងវិញរបស់ក្រុមប្រឹក្សាសន្តិសុខអំពីសេចក្តីសម្រេចចិត្តទាំងនេះ។
ក្រុមប្រឹក្សាសន្តិសុខនៃអង្គការសហប្រជាជាតិបានរៀបចំកិច្ចពិគ្រោះពិភាក្សាស្តីពីបញ្ហាឥណ្ឌានិងប៉ាគីស្ថានកាលពីថៃ្ងទី ១៦ ខែសីហាដើម្បីស្តាប់របាយការណ៍របស់លេខាធិការដ្ឋាននៃអង្គការសហប្រជាជាតិស្តីពីស្ថានភាពនៅ Kashmir នាពេលបច្ចុប្បន្ននិងការងាររបស់ក្រុមអ្នកសង្កេតការណ៍យោធារបស់អង្គការសហប្រជាជាតិនៅប្រទេសឥណ្ឌានិងប៉ាគីស្ថាន។
នាពេលថ្មីៗនេះ ស្ថានភាពនៅតំបន់ Kashmir មានភាពតានតឹង កងទ័ពឥណ្ឌានិងប៉ាគីស្ថានបានបាញ់គ្នាម្តងហើយម្តងទៀតនៅក្បែរតំបន់ខ្សែការពារ Kashmir ៕