ថ្ងៃទី២៤ខែមិថុនា នៅវិមានសភាប្រជាជនក្រុងប៉េកាំង លោកWangQishanអនុប្រធានរដ្ឋចិនបានជួបពិភាក្សាជាមួយប្រធានគណៈប្រតិភូនៃប្រទេសអាហ្រ្វិកដែលចូលរួមកិច្ចប្រជុំអ្នកសម្របសម្រួលសម្រាប់ការអនុវត្តសមិទ្ធផលនៃសន្និសីទកំពូលក្រុងប៉េកាំងនៃវេទិកាសហប្រតិបត្តិការចិន–អាហ្រ្វិក។
ថ្លែងក្នុងកិច្ចជំនួប លោកWangQishanបានលើកឡើងថា ការរៀបចំធ្វើកិច្ចប្រជុំអ្នកសម្របសម្រួលសម្រាប់ការអនុវត្តសមិទ្ធផលនៃសន្និសីទកំពូលក្រុងប៉េកាំងនៃវេទិកាសហប្រតិបត្តិការចិន–អាហ្រ្វិកគឺជាវិធានការដ៏សំខាន់ដែលចិននិងអាហ្រ្វិកធ្វើឡើងដើម្បីចាប់ដៃគ្នាអនុវត្តសមិទ្ធផលនៃសន្និសីទកំពូលក្រុងប៉េកាំងដែលបើកធ្វើនៅខែកញ្ញាឆ្នាំ២០១៨ ហើយក៏ជាព្រឹត្តិការណ៍ដ៏ធំមួយនៃទំនាក់ទំនងរវាងចិននិងអាហ្រ្វិកក្នុងឆ្នាំ២០១៩នេះផងដែរ ។ ប្រទេសចិននឹងបន្តរួមសហការជាមួយភាគីអាហ្រ្វិក ដើម្បីជំរុញឱ្យទំនាក់ទំនងភាពជាដៃគូសហប្រតិបត្តិការយុទ្ធសាស្រ្តគ្រប់ជ្រុងជ្រោយរវាងចិននិងអាហ្រ្វិកឡើងដល់កម្រិតថ្មីថែមទៀត ក្នុងន័យបង្កើតជាសហគមន៍រួមវាសនាចិននិងអាហ្រ្វិកដែលកាន់តែមានភាពស្អិតល្មួត។
ជាការឆ្លើយតប បណ្តាប្រធានគណៈប្រតិភូអាហ្រ្វិកបានថ្លែងថា អាហ្រ្វិកសូមកោតសរសើរចំពោះរូបមន្តអភិវឌ្ឍន៍និងសមិទ្ធផលដ៏មហិមារបស់ប្រទេសចិន រំពឹងថា អាចរួមសហការជាមួយភាគីចិនក្នុងកិច្ចកសាងខ្សែក្រវាត់និងផ្លូវ ដើម្បីរួមគ្នាអនុវត្តឱ្យបានល្អនូវលទ្ធផលជាផ្លែផ្កានានានៃវេទិកាសហប្រតិបត្តិការចិន–អាហ្រ្វិក ៕