លោក ស៊ីជីនភីង បានជួបពិភាក្សាការងារជាមួយលោក ភូទីន ប្រធានាធិបតីរុស្ស៊ីនៅក្រុង St. Petersburg កាលពីថ្ងៃទី ៦ ខែមិថុនា។ប្រមុខរដ្ឋនៃប្រទេសទាំងពីរបានធ្វើការផ្លាស់ប្តូរមតិគ្នាយ៉ាងស៊ីជម្រៅស្តីពីស្ថានភាពអន្ដរជាតិនាពេលបច្ចុប្បន្ននេះព្រមទាំងបញ្ហាអន្តរជាតិនិងតំបន់សំខាន់ៗ។
ថែ្លងក្នុងកិច្ចជំនួប លោក ស៊ីជីនភីង បានសង្កត់ធ្ងន់ថា នៅក្នុងបរិបទនៃស្ថានភាពបច្ចុប្បន្ននេះ ភាគីទាំងពីរគួរតែធ្វើឱ្យស៊ីជម្រៅនូវកិច្ចសហប្រតិបត្តិការជាយុទ្ធសាស្ត្រ នេះគឺមិនត្រឹមតែការពារផលប្រយោជន៍រវាងចិននិងរុស្ស៊ីប៉ុណ្ណោះទេ ថែមទាំងក៏ការពារបទដ្ឋានអន្តរជាតិនិងសីលធម៌អន្តរជាតិជាមូលដ្ឋាន ក៏ដូចជាធានារក្សានូវសន្តិភាព សន្តិសុខនិងស្ថិរភាពនៃពិភពលោកទៀតផង។
ជាការឆ្លើយតប លោកភូទីនបានថែ្លងថា មិនថា ស្ថានភាពអន្តរជាតិកាន់តែស្មុគស្មាញនិងផ្លាស់ប្តូរកាន់តែច្រើននោះទេ ប្រទេសទាំងពីរ រុស្ស៊ីនិងចិនគួរតែពង្រឹងនិងធ្វើឱ្យស៊ីជម្រៅនូវជំនឿទុកចិត្តផ្នែកនយោបាយ ក៏ដូចជាពង្រឹងការសម្របសម្រួលនិងកិច្ចសហប្រតិបត្តិការនៅក្នុងកិច្ចការអន្តរជាតិព្រមទាំងធានារក្សានូវបទដ្ឋានជាមូលដ្ឋាននៃច្បាប់អន្តរជាតិនិងទំនាក់ទំនងអន្តរជាតិ៕
