ថ្ងៃទី ១៥ ខែកុម្ភៈ ពិធីចុះហត្ថលេខាលើកិច្ចព្រមព្រៀងមួយចំនួនថ្មីទៀតស្តីពីគម្រោងសាងសង់នៅប្រទេសឡាវដែលប្រើប្រាស់មូលនិធីសហប្រតិបតិ្តការឡានឆាង-មេគង្គបានប្រារព្ធធ្វើនៅក្រុងវៀងចន្ទន៍ រដ្ឋធានីប្រទេសឡាវ លោក Jiang Zaidong ឯកអគ្គរដ្ឋទូតចិនប្រចាំនៅប្រទេសឡាវ និងលោក Thongphane Savenphet អនុរដ្ឋមន្ត្រីការបរទេសឡាវបានចុះហត្ថលេខាក្នុងនាមជាតំណាងប្រទេសរៀងខ្លួន ។
ថ្លែងក្នុងពិធីលើកនេះ លោក Jiang Zaidong បានលើកឡើងថា គម្រោងសាងសង់លើកដំបូងនៃកិច្ចសហប្រតិបតិ្តការឡានឆាង-មេគង្គចំនួន ១៣ គម្រោងបានចាប់ដំណើរការណ៍រួចហើយ លើសពីនេះទៅទៀត គម្រោងចំនួន២១ទៀតរបស់ប្រទេសឡាវត្រូវបានអនុម័តទៀត ប្រការនេះជាផ្លែផ្កាសំខាន់មួយទៀតនៃកិច្ចសហប្រតិបតិ្តការរវាងចិននិងឡាវក្នុងក្របខ័ណ្ឌកិច្ចសហប្រតិបត្តិការឡានឆាង-មេគង្គ ។ ប្រទេសចិនរីករាយរួមសហការជាមួយប្រទេសឡាវ បន្តបំពេញភារកិច្ចឲ្យបានល្អក្នុងឋានៈជាប្រទេសជាសហប្រធានផ្លាស់វេនតទៅទៀត ក្នុងន័យរួមសហការជាមួយប្រទេសជាសមាជិកចំនួន៤ផ្សេងទៀត គ្រោងផែនការនិងជំរុញកិច្ចសហប្រតិបតិ្តការឡានឆាង-មេគង្គតទៅខាងមុខនេះ ។
ថ្លែងក្នុងពិធីលើកនេះ លោក Thongphane Savenphet បានលើកឡើងថា គម្រោងដែលត្រូវអនុម័តទាំងនេះ នឹងរួមចំណែកយ៉ាងសកម្មក្នុងការអភិវឌ្ឍសេដ្ឋកិច្ចនិងសង្គមនៃប្រទេសឡាវ ក៏មានអំណោយផលដល់ការធ្វើឲ្យកិច្ចសហប្រតិបតិ្តការដ៏មេត្រីភាពរវាងឡាវនិងចិនមានភាពកាន់តែស៊ីជម្រៅ ក៏ដូចជាជំរុញការបង្កើតមហាគ្រួសារឡានឆាង-មេគង្គប្រកបដោយភាពកាន់តែស្អិតល្មួតផងដែរ ។
សូមបញ្ជាក់ថា កិច្ចសហប្រតិបតិ្តការឡានឆាង-មេគង្គ គឺជាយន្តការសហប្រតិបតិ្តការធុនថ្មីក្នុងមហាអនុតំបន់ដែលបង្កើតឡើងដោយប្រទេសទាំង៦តាមបណ្តោយទន្លេឡានឆាងនិងមេគង្គ គឺប្រទេសចិន កម្ពុជា ថៃ ឡាវ មីយ៉ាន់ម៉ានិងវៀតណាម ។ ក្នុងសនិ្នសីទថ្នាក់ដឹកនាំលើកដំបូងនៃកិច្ចសហប្រតិបតិ្តការឡានឆាង-មេគង្គកាលពីខែមីនា ឆ្នាំ ២០១៦ ប្រទេសចិនបានស្នើឲ្យបង្កើតមូលនិធីសហប្រតិបតិ្តការឡានឆាង-មេគង្គ គឺក្នុងរយៈពេល៥ឆ្នាំ នឹងផ្តល់ថវិកាចំនួន៣រយលានដុល្លារអាមេរិកដល់កិច្ចសាងសង់គម្រោងធុនតូចនិងមធ្យមរបស់ប្រទេសទាំង៦ ៕