ថ្ងៃទី ១៥ ខែកុម្ភៈ នៅវិមានសភាប្រជាជនចិនក្រុងប៉េកាំង លោកស៊ី ជីនភីង ប្រធានរដ្ឋចិនបានជួបពិភាក្សាជាមួយលោក Robert Lighthizerតំណាងពាណិជ្ជកម្មអាមេរិកនិងលោក Steven Mnuchin រដ្ឋមន្រ្តីក្រសួងហិរញ្ញវត្ថុអាមេរិកដែលអញ្ជើញមកចូលរួមកិច្ចពិភាក្សាជាន់ខ្ពស់អំពីសេដ្ឋកិច្ចនិងពាណិជ្ជកម្មរវាងចិននិងអាមេរិកជុំថ្មីមួយនៅប្រទេសចិន ។
ក្នុងកិច្ចជំនួប លោកស៊ី ជីនភីង បានចង្អុលបង្ហាញថា ទំនាក់ទំនងរវាងចិននិងអាមេរិកជាទំនាក់ទំនងទ្វេភាគីសំខាន់ជាងគេមួយលើពិភពលោកនាពេលបច្ចុប្បន្ន ។ ការរក្សាទំនាក់ទំនងរវាងចិននិងអាមេរិកឲ្យវិវឌ្ឍន៍រីកចម្រើនប្រកបដោយរឹងមាំនិងស្ថិរភាព គឺសមស្របនឹងផលប្រយោជន៍ជាមូលដ្ឋានរបស់ប្រជាជននៃប្រទេសទាំងពីរ ហើយក៏ជាការក្តីសង្ឃឹម របស់សហគមន៍អន្តរជាតិផងដែរ ។ រំពឹងថា ក្រុមការងារនៃប្រទេសយើងទាំងពីរអាចយោងតាមគោលការណ៍និងទិសដៅដែលខ្ញុំនិងលោកត្រាំបានកំណត់ទុកជាមុន បង្កើនការប្រាស្រ័យទាក់ទង ផ្តោតសំខាន់ទៅលើកិច្ចសហប្រតិបត្តិការ គ្រប់គ្រងការខ្វែងគំនិត សំដៅជំរុញកិច្ចសហប្រតិបត្តិការផ្នែកសេដ្ឋកិច្ចនិងពាណិជ្ជកម្ម ក៏ដូចជាទំនាក់ទំនងរវាងប្រទេសចិននិងអាមេរិកឲ្យរីកចម្រើនទៅមុខប្រកបដោយភាពរឹងមាំនិងនឹងនរ ។
ជាការឆ្លើយតប លោក Robert Lighthizer និងលោក Steven Mnuchin បានថ្លែងថា ទំនាក់ទំនងពាណិជ្ជកម្មរវាងអាមេរិកនិងចិនមានសារៈសំខាន់ណាស់ ។ នៅដំណាក់កាលក្រោយ ក្រុមការងារអាមេរិករីករាយរួមសហការជាមួយក្រុមការងារចិន ធ្វើឲ្យការប្រាស្រ័យទាក់ទងមានភាពកាន់តែស្អិតល្មួត ខំប្រឹងដើម្បីឈានដល់មតិឯកភាពគ្នាលើកិច្ចព្រមព្រៀងដែលសមស្របនឹងផលប្រយោជន៍របស់ភាគីទាំងពីរ ៕
