ថ្ងៃទី៨ខែធ្នូ សកលវិទ្យាល័យក្វាងស៊ីប្រទេសចិនបានធ្វើពិធីអបអរសាទរខួបទី៩០នៃការបង្កើតសកលវិទ្យាល័យរបស់ខ្លួន ។ អ្នកជំនាញនិងបញ្ញវន្តចិននិងអន្តរជាតិ ប្រតិភូតំណាងនៃសកលវិទ្យាល័យនានា តំណាងនៃអតីតនិស្សិត សាស្ត្រាចារ្យ គ្រូបង្រៀននិងនិស្សិតនៃសកលវិទ្យាល័យក្វាងស៊ីសរុប៥០០០រូបបានចូលរួមពិធីអបអរសាទរនេះ និងបានគោរពភ្លេងជាតិ ដើម្បីអបអរសាទរខួបទី៩០នៃការបង្កើតសកលវិទ្យាល័យក្វាងស៊ី ។
ពិធីនេះបានចែកវិញ្ញាបនបត្រកិត្តិយសជូនសាស្ត្រាចារ្យនិងគ្រូបង្រៀនដែលបានបង្រៀនអស់ពេលជាង៤០ឆ្នាំ ព្រមទាំងប្រកាសពីលទ្ធផលនៃការបោះឆ្នោតជ្រើសរើសព្រឹត្តិការណ៍ទាំង១០នៃខួបទី៩០នៃការបង្កើតសកលវិទ្យាល័យក្វាងស៊ីប្រទេសចិន ។
លោក Lu Xinshe លេខាធិការគណៈកម្មការបក្សកុម្មុយនិស្តចិននៅភូមិភាគស្វយ័តជនជាតិជាំងក្វាងស៊ីប្រទេសចិនបានសំដែងការអបអរសាទរចំពោះសមិទ្ធផលដ៏អស្ចារ្យនៃសកលវិទ្យាល័យក្វាងស៊ីដែលបានបង្កើតឡើង៩០ឆ្នាំមក ហើយបានកោតសរសើរខ្ពស់ចំពោះសកលវិទ្យាល័យក្វាងស៊ីដែលបានរួមវិភាគទានសំខាន់ៗចំពោះដំណាក់កាលប្រវត្តិសាស្ត្រនៃការអភិវឌ្ឍភូមិភាគស្វយ័តក្វាងស៊ីនិងប្រទេសជាតិផងដែរ ។ លោកបានថ្លែងថា ការអភិវឌ្ឍនៃសកលវិទ្យាល័យក្វាងស៊ីជាការឆ្លុះបញ្ចាំងនៃការអភិវឌ្ឍកិច្ចការអប់រំសាលាឧត្តមសិក្សារបស់ក្វាងស៊ី ហើយក៏ជាចំណែកដ៏សំខាន់នៃសមិទ្ធផលដ៏អស្ចារ្យចាប់តាំងពីភូមិភាគស្វយ័តជនជាតិជាំងក្វាងស៊ីបានបង្កើតឡើង៦០ឆ្នាំមក ជាពិសេសគឺការអនុវត្តកំណែទម្រង់និងការបើកទូលាយ៤០ឆ្នាំរបស់ចិន ។
គួរបញ្ជាក់ថា សកលវិទ្យាល័យក្វាងស៊ីដែលបង្កើតឡើងនៅឆ្នាំ១៩២៨ជាសកលវិទ្យាល័យចម្រុះដែលមានប្រវត្តិសាស្ត្រយូរលង់បំផុតនិងមានទ្រង់ទ្រាយធំបំផុតនៅក្វាងស៊ី ។ សកលវិទ្យាល័យក្វាងស៊ីបានចាត់ទុក“ស្តារភាពរុងរឿងនៃប្រជាជាតិចិនឡើងវិញនិងធ្វើឲ្យក្វាងស៊ីរីកលូតលាស់”ជាកម្មវត្ថុបង្កើតសាលាក្នុងរយៈពេល៩០ឆ្នាំកន្លងទៅនេះ និងប្រកាន់ខ្ជាប់នូវបាវចនាសាលាស្តីពី“ឧស្សាហ៍ព្យាយាមនិងស្មោះត្រង់ យកចិត្តទុកដាក់ចំពោះការសិក្សានិងខិតខំប្រឹងប្រែងច្នៃប្រឌិតថ្មី” ដោយបានបញ្ជូនធនធានមនុស្សដ៏ឆ្នើមជាច្រើនសម្រាប់បម្រើប្រយោជន៍សង្គម ។ បច្ចុប្បន្ននេះ សកលវិទ្យាល័យក្វាងស៊ីបានកកើតទៅជាសាលារៀនដែលមានលក្ខណៈពិសេសដ៏ច្បាស់លាស់និងមានមូលដ្ឋានវប្បធម៌មនុស្សជាតិដ៏ជ្រាលជ្រៅ ដែលក្លាយទៅជាសកលវិទ្យាល័យសហការបង្កើតដោយក្រសួងអប់រំចិននិងរដ្ឋបាលនៃភូមិភាគស្វយ័តជនជាតិជាំងក្វាងស៊ីបង្កើតនិងជាសកលវិទ្យាល័យដែលជាតិផ្តល់ការគាំទ្រជាសំខាន់ផងដែរ ។