ថ្ងៃទី ៩ ខែវិច្ឆិកានេះជាខួបគម្រប់ទី ៦៥ នៃទិវាបុណ្យឯករាជ្យជាតិរបស់ប្រទេសកម្ពុជា។ លោក លី ខឹឈាំង នាយករដ្ឋមន្ត្រីនៃសាធារណរដ្ឋប្រជាមានិតចិនបានផ្ញើសារលិខិតអបអរសាទរជូនចំពោះ សម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
លោក លី ខឹឈាំង បានថ្លែងក្នុងសារលិខិតអបអរសាទរថា ចំណងមិត្តភាពរវាងប្រទេសចិននិងប្រទេសកម្ពុជាមានប្រវត្តិយូរលង់ណាស់មកហើយ ចិននិងកម្ពុជាគឺជាអ្នកជិតខាងល្អ មិត្តភក្តិល្អ បងប្អូនល្អ ដៃគូល្អ។ ក្រោមការខិតខំប្រឹងប្រែងរួមគ្នារបស់ភាគីទាំងពីរ កិច្ចសហប្រតិបត្តិការដែលផ្តល់ផលប្រយោជន៍ដល់គ្នាទៅវិញទៅមក ក្នុងគ្រប់វិស័យរវាងប្រទេសទាំងពីរកាន់តែស៊ីជម្រៅថែមទៀត ដែលបាននាំមកនូវផលប្រយោជន៍ជាក់ស្តែងនិងពិតប្រាកដសម្រាប់ប្រជាជនប្រទេសទាំងពីរ។ លោក លី ខឺឈាង បានបង្ហាញឆន្ទះក្នុងការជំរុញឲ្យទំនាក់ទំនងដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងចិននិងកម្ពុជាបន្តឈានដល់កម្រិតខ្ពស់ថ្មីផងដែរ។
ថ្ងៃដដែល លោក វ៉ាង យី សមាជិកក្រុមប្រឹក្សាកិច្ចការរដ្ឋចិននិងជារដ្ឋមន្ត្រីក្រសួងការបរទេសចិនក៏បានផ្ញើសារលិខិតអបអរសាទរជូនលោក ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិកម្ពុជាផងដែរ៕
